Bisbarra, 1 de setembro do 2023 – Os datos non deixan dúbidas. As mostras tomadas por Augas de Galicia no río San Finx detectan que os niveis de cadmio, cobre ou cinc superan por moito o permitido.
As medicións foron realizadas no San Finx o pasado 11 de agosto, tanto antes como despois da mina. As mostras tomadas augas abaixo contiñan 78 veces máis de cadmio, 48 máis de cobre e ata 8 veces máis de cinc do que autoriza a lexislación.
En contraste con estes datos, na mostra tomada augas arriba, na zona do museo, os valores encontrábanse dentro da legalidade, o que evidencia que a contaminación se produce polas vertidos ilegais e lixiviados que continúa causando a mina.
A Plataforma esixe á Xunta que inicie os correspondentes expedientes sancionadores por vertidos ilegais e retire, á empresa mineira que opera en San Finx, a autorización de verteduras concedida ilegalmente no pasado mes de febreiro, por vulneración do condicionado.
Por outra parte, as confrarías de Noia e Portosín, que iniciaron un proceso penal contra a mineira por presuntos delitos contra o medio ambiente, xa trasladaron estas novas evidencias ao Xulgado instrutor da causa en Noia, solicitando que adopte medidas cautelares para evitar a continuidade do dano.
Procesos xudiciais pendentes
Á marxe da causa penal, xa están en curso varios procesos xudicial contra a propia autorización de verteduras, desta volta sendo os xulgados do contencioso de Santiago os que terán que resolver sobre a legalidade do permiso outorgado o pasado mes de febreiro.
Mesmo así, adiantan una avalancha de demandas unha vez que Augas de Galicia aínda non resolveu os máis de 20 recursos de alzada presentados contra a autorización, incluíndo os das confrarías de Noia, Portosín, Porto do Son, Muros e Rianxo, as organizacións de produtores de mexillón Olvimar e a APM da Pobra, así como Ecoloxistas en Acción, Federación Ecoloxista Galega, ADEGA, Verdegaia, Sociedade Galea de Historia Natural, Montescola, Sindicato Labrego Galego, Tralapena e Salvemos Monteferro.
Para a plataforma comarcal os recursos presentados evidencian a enorme oposición social a unha autorización en San Finx que se outorgou tras sete anos de irregularidades. Lembran que os propios altos cargos e funcionarios da Xunta que outorgaron a autorización de vertidos están imputados nunha causa xudicial paralela por presuntos delitos de prevaricación, malversación e falsidade documental.
