Bisbarra, 9 de outubro do 2019 – O próximo sábado celebrarase o V Camiño da Diversidade que partira do Santuario da Escravitude, en Padrón, e chegará a Santiago co fin de visibilizar o traballo da Fundación Indaga.
O V Camiño da Diversidade partirá as dez da mañá e percorrerá parte do Camiño Portugués ata o Obradoiro. Conta coa colaboración dos concellos de Padrón, Ames e Santiago e está organizada pola Fundación Ingada (Instituto Galego do TDAH e Trastornos Asociados)
A concelleira de Benestar Social do Concello de Ames, Luísa Feijóo; a concelleira de Políticas Sociais do Concello de Santiago de Compostela, Mila Castro; o alcalde de Padrón, Antonio Fernández Angueira; e Claudia Balado, psicóloga da Fundación forn os encargados de realizar onte a presentación aos medios de comunicación.
A ruta terá a súa principal parada no Milladoiro (Ames), onde os/as camiñantes comerán algo e participarán en diversas actividades, coma a construción dun “mural de soños”. Ao longo do percorrido haberá outras accións, como xogos populares ou unha actividade de recoñecemento de flora e fauna, tal como explicou Claudia Balado, quen anunciou varias sorpresas.
Tras 19 quilómetros, o Camiño da Diversidade rematará na praza do Obradoiro, onde se lerá o Manifesto da Diversidade.
Hoxe mércores aínda está aberta a inscrición para participar nesta ruta e xa hai unhas 300 persoas confirmadas, procedentes de diferentes partes de Galicia. Os/as participantes que acudan en autobús ata a Escravitude pagarán 10 euros, que inclúen o transporte e o seguro. Os/as que acudan pola súa conta teñen a inscrición de balde.
Ingada
O Instituto Galego do TDAH e Trastornos Asociados (Fundación Ingada) xorde no 2014 co fin de proporcionar asistencia integral en Galicia ás persoas afectadas polo TDAH e/ou trastornos asociados e as súas familias, dada a alta prevalencia destas patoloxías na nosa sociedade e as deficiencias existentes para a súa atención en tódalas áreas necesarias (educativa, social, clínica, familiar, laboral). A Fundación está formada por un equipo multidisciplinar que ten como obxectivo mellorar a calidade de vida dos usuarios e usuarias.
Ofrece soporte docente, terapéutico, comunitaria, educativo, divulgativo, sensibilizador… Neste marco, o V Camiño da Diversidade formúlase cunha actividade educativa e de ocio para potenciar valores como a solidariedade, o compañeirismo ou a vida saudable. A Fundación quere así sensibilizar á cidadanía sobre o respecto á diversidade de cada un/unha, sen exclusións, e fomentar a integración e o desenvolvemento digno de todas as persoas. Este proxecto é beneficiario do programa autonómico “O teu Xacobeo 2021”.