Bisbarra, 16 de xaneiro do 2023 – O Bloque Nacionalista Galego da comarca do Deza denuncia as peaxes da autoestrada de Ourense, a AP-53, que consideran desproporcionados.
Os nacionalistas lembran que en outros lugares como Madrid o Goberno rescatou ata oito tramos de estradas radiais da capital mentres aquí séguese a pagar. Engaden que os prexudicados son sectores que terán un lastre máis na súa actividade económica e consecuentemente prexudicará a todos os veciños da comarca.
O BNG critica a postura do alcalde de Lalín, José Crespo, xa que “foi o seu partido cando gobernaba Aznar o que prorrogou as concesións da AP-9 e da AP-53 ata o 2048. Agora reclama a transferencia a Galicia pero cando o BNG o pedía era rexeitado”.
Tamén poñen o foco no feito de que se trata da única autoestrada que non ten rebaixa para os usuarios habituais, que a Xunta puxo 60 millóns de euros para a súa construción pese a non ser da súa competencia e que en días de chuvia “principalmente no treito da autoestrada que comunica Santiago e Lalín a circulación por esta vía de alta capacidade encerra unha perigosidade que debe de ser resolta con urxencia. O carril dereito da marcha en ambos sentidos non é capaz de drenar correctamente a auga, polo que se forman importantes acumulacións e pozas que dificultan a circulación e poñen en perigo os condutores”.
O BNG remata a nota de prensa explicando que “A redución das tarifas na AP-53 será positivas para a a comarca e para toda Galiza, xa que gran parte do tráfico con destino ou saída na Galiza central vai por esta vía, e se non o fai é pola súa exorbitada tarifa”.
