Bisbarra, 28 de novembro do 2022 – O actual grupo Marea veciñal de Touro constitúese como grupo independente e concorrerá ás eleccións do 2023 como Movemento Veciñal.
O Movemento Veciñal de Touro é na actualidade o líder da oposición no concello de Touro. A formación presentouse por primeira vez aos comicios no 2019 acadando tres concelleiros. A alternativa política ten novos estatutos que sustentan o desenvolvemento do traballo político “na participación veciñal, o desenvolvemento de políticas sociais, a loita contra o desemprego, o desenvolvemento económico e o apoio ó sector agroalimentario, e a defensa dos servizos públicos e a protección do medio natural e do territorio”.
Nos novos estatutos tamén se detallan as fórmulas de participación veciñal, establecéndose a figura do afiliado-colaborador, que dará dereito de voz e voto no máximo órgano de decisión do partido en cumprimento do Código Ético, ou a creación de grupos específicos de traballo, nos que calquera veciño, colaborador ou non, poderá participar en prol do interese colectivo para o Concello de Touro.
Actualmente o Movemento Veciñal de Touro (MVT) conta xa cun amplo equipo, do que forman parte tanto os membros da candidatura ás anteriores municipais como novos nomes que se seguen sumando a este proxecto político de ámbito local.
Novas formacións en distintos concellos
Ademais do cambio en Touro, que libera ao Movemento Veciñal de ataduras con outras plataformas, nas vindeiras eleccións presentaranse novos partidos en concellos da bisbarra e na propia Compostela.
En Oroso o pasado mes de outubro entraba no rexistro de partidos do Ministerio do Interior Alternativa Oroso que ten como presidente a Manuel Pazos Gómez. O mesmo xeito en abril pasado era rexistrado Por e Para Santiago que se presentará na Capital e que ten como presidente a Ángel Jimenez Lavilla.
