Bisbarra, 4 de abril do 2024 – A Aula da Natureza de Ames organiza este sábado, 6 de abril, un obradoiro de construción de refuxios para morcegos.
Esta actividade está dirixida a rapaces e rapazas de entre 8 e 14 anos, e realizarase en horario de 11:00 a 14:00 horas na Carballeira dos Trasgos, en Paramuíño. Para inscribirse é preciso enviar a ficha de inscrición ao enderezo auladanatureza@concellodeames.gal. Ames oferta 35 prazas, que se cubrirán por orde de inscrición. En caso de choiva, o obradoiro farase nas instalacións da Aula da Natureza, no lugar de Quintáns (Ameixenda).
Os morcegos seguen sendo grandes descoñecidos para o público xeral e, aínda que son habitantes habituais de zonas urbanas e rurais e achegan grandes beneficios para o benestar humano, estes pequenos mamíferos arrastran unha connotación negativa, rodeada de mitos e datos erróneos.
Os morcegos xogan un papel clave no control de pragas agrícolas e de mosquitos. Poden comer entre 600 e 1,200 mosquitos por hora e nunha soa noite, o total equivalente ao seu peso corporal. Sen eles, a nosa vida sería moito máis incómoda. Ademais, xunto coas aves, controlan a procesionaria do piñeiro de parques e xardíns e outras pragas
O obradoiro que organiza o concello de Ames, a través da Aula da Natureza, consistirá na construción e colocación de caixas niño-refuxio para colonias de morcegos deseñadas tanto para morcegos semi – urbanos como de campo.
Ao longo da xornada, profundarase sobre as ameazas que existen sobre este grupo de mamíferos, a necesidade e obxectivos de colocar refuxios, as razóns polas que se elixe unha paraxe concreta para a súa colocación, os motivos polos que se elixe un lugar exacto (xeralmente unha árbore) e a altura e orientación recomendable, que especies e cando poden ocupar ditas caixas. As caixas colocadas servirán como recurso educativo para explicar á veciñanza e aos escolares que visitan a zona a importancia destes animais.
Servizo de autobús
O obradoiro contará cun servizo de autobús, que terá o seguinte horario e paradas:
Saída:
10:30 horas – Pazo da Peregrina de Bertamiráns
10:45 horas – Casa da Cultura do Milladoiro
Regreso:
14:00 horas – Casa da Cultura do Milladoiro
14:15 horas – Pazo da Peregrina de Bertamiráns
Para obter máis información, pódese enviar un correo electrónico ao enderezo auladanatureza@concellodeames.gal.
