Ames, 29 de decembro do 2021 – O concello de Ames decidiu concentrar todo o relativo á Axenda 2030 nunha nova concellaría que asumirá David Santomil.
David Santomil
O alcalde, Blas García, asinou o pasado luns un decreto que modifica as concellarías e engade a de Axenda Urbana. Davi Santomil engadirá está área ás de educación, servizos educativos complementarios e patrimonio histórico que xa xestionaba.
Unha axenda cara a sostenibilidade
A Corporación municipal de Ames aprobou por unanimidade, no pleno ordinario de outubro de 2020, a adhesión á Rede de Entidades Locais para a implementación e desenvolvemento da Axenda 2030. O obxectivo deste proxecto é favorecer a coordinación de actuacións entre os Gobernos Locais para lograr o desenvolvemento sostible.
A nova concellaría crease co fin de coordinar os traballos relacionados con este proxecto estratéxico. O alcalde, Blas García, lembra que Santomil “é a persoa axeitada para xestionar a área de Axenda Urbana pola súa formación académica e de investigación, xa que é licenciado con grao en Xeografía e Doutor en Xeografía e Análise do Territorio, pola Universidade de Santiago de Compostela”.
O obxectivo é aglutinar dentro dunha mesma área todo o traballo relacionado coa Axenda 2030, que se creará durante os vindeiros anos. Búscase recoller dentro do documento final, actualmente na súa fase inicial, o Plan Xeral de Ordenación Municipal (PXOM), o Plan de Mobilidade Urbana Sostible (PMUS) e maila EDUSI Impulsa Ames.
David Santomil, destaca que “a Axenda Urbana de Ames vai ser o documento estratéxico cara o 2030 no que se integran todas as actuacións no territorio (PXOM, EDUSI, PMUS,…) e que vai ser fundamental para captar novos fondos europeos no futuro próximo. Todo un reto e un orgullo tamén, pois é unha área relacionada coa miña formación académica e de investigación. Agradezo a confianza depositada en min por parte dos compañeiros e compañeiras do grupo de goberno e, especialmente, do alcalde”.
Plan de Acción Local de Ames
No Plan Ames Progresa 2021-2023 inclúese unha cantidade orzamentaria de 100.000 euros. A razón débese a que a Axenda Urbana é a folla de ruta que vai marcar a estratexia e as accións para levar a cabo na vindeira década para facer do concello de Ames un lugar de convivencia máis amable, ordenado e saudable. Este documento non normativo fixa inicialmente unha diagnose da situación e marca as liñas de actuación a desenvolver dun xeito máis equitativo e sostible.
Durante este mes de decembro iniciáronse os trámites para a contratación do servizo de consultoría e asistencia técnica, que se encargará de prestar as tarefas e o asesoramento na elaboración dos documentos precisos de acordo co marco estratéxico, a metodoloxía, directrices e criterios que recolle a Axenda Urbana Española, para poder culminar co Plan de Acción Local de Ames, dando resposta aos ODS incluídos na Axenda Urbana das Nacións Unidas, na Axenda Urbana Europea e na Axenda Urbana Española. A proposta metodolóxica deberá partir obrigatoriamente da elaboración do documento inicial de diagnóstico estratéxico, así como o asesoramento técnico para o análise das diferentes convocatorias para obter financiamento a través dos distintos fondos europeos aos que interesaría presentar candidatura.
Durante o primeiro semestre de 2022, e unha vez rematado o documento inicial de diagnóstico estratéxico, procederase á licitación para a elaboración do Plan de Acción Local do Concello de Ames.
