Bisbarra, 4 de maio do 2023 – Ames organiza este sábado, no Campo da Festa da Bugallido desde as once e media da mañá, a I Feira do Pan e do Cereal.
A través das exposicións, charlas, obradoiros e degustacións, a I Feira do Pan e do Cereal busca ser un referente e difundir a longa tradición panadeira. Trátase de poñer en valor un produto recoñecido como Indicación Xeográfica Protexida (IGP).
Programa da Feira do Pan e do Cereal
A Feira inclúe un amplo programa que se inaugura ás 11:00 horas coa Exposición de Cereais Autóctonos e maquinaria de uso. O programa prosegue ás 11:30 horas, coa charla “O divorcio entre Agricultura e Biodiversidade” ofrecida polo profesor de Zooloxía de USC, Carlos Otero González. A continuación, Mª Ángeles Romero, directora da Cátedra do Pan e do Cereal do Campus Terra da USC, impartirá o relatorio “Falemos de pan”.
As actividades continúan ás 13:00 horas co Túnel do Pan e a degustación de diferentes variedades do produto. Entre as 14:00 e as 15:30 haberá un descanso para comer con polbeiro e acompañamento musical.
Ás 15:30 horas comezarán os eventos da tarde cun Obradoiro de pan. Trátase dun taller para todos os públicos no que os asistentes coñecerán paso a paso o proceso de elaboración do pan.
Seguidamente, ás 16:30 horas, será a quenda da charla impartida por Fernando Almeida, de Sementares S.L., baixo o título: “O cereal autóctono e pan galego con IXP”.
O programa da primeira edición da Feira do Pan e do Cereal péchase co Obradoiro de empanada tradicional que se imparte dende as 17:15 horas. Será, tamén, un taller pensado para todos os públicos onde os participantes se acheguen ao proceso de elaboración dunha empanada de millo.
As charlas e os obradoiros son de balde e con entrada libre ata completar aforo.
