Ames, 25 de marzo do 2021 – O pleno ordinario de Ames debaterá esta tarde, entre outras cuestións, a licitación do servizo de axuda no fogar, SAF.
A sesión tratará así mesmo a aprobación do expediente de licitación do servizo de limpeza viaria e xestión dos puntos limpos e as alegacións, e aprobación definitiva, da ordenanza reguladora de terrazas.
Modificación do contrato do servizo de axuda no fogar
O Pleno debaterá a aprobación do expediente de modificación do contrato do Servizo de Axuda no Fogar, na modalidade de SAF dependencia. A modificación será por importe de 336.845,69 euros para a ampliación de 850 horas mensuais. O Pleno aprobou o 25 de xuño de 2020 a adxudicación do contrato vixente que foi asinado o 22 de xullo dando inicio a prestación do servizo o 1 de agosto.
Limpeza e puntos limpos
A sesión de Ames debaterá a aprobación do expediente de contratación do servizo de limpeza viaria e xestión dos Puntos Limpos. O importe base de licitación ascende a 1.064.223,85 euros, o que supón un incremento económico de 336.607,95 euros respecto do anterior contrato. Este incremento débese a ampliación de zonas a atender.
O servizo incluirá a limpeza nas distintas prazas do concello, que actualmente estaban fóra do contrato e que as limpaba o persoal da Brigada municipal de obras, e mailas áreas de aparcamentos dos núcleos urbanos.
Tamén se inclúen diversas zonas do rural, especialmente aquelas nas que hai beirarrúas, destacando a limpeza de A Ponte Maceira (principal núcleo turístico de Ames) ou os tramos do Camiño de Santiago. Tamén se vai ampliar o horario de atención do Punto Limpo, de luns a sábado, de 9.00 a 15.00 horas e de 16.00 a 20.00 horas. Outra das novidades será o servizo do Punto limpo móbil, xa que se vai a proporcionar á veciñanza un servizo de recollida selectiva de residuos domésticos especiais que deben ser obxecto de xestión diferenciada, para a súa reciclaxe, valorización ou eliminación controlada. Este servizo realizarase de maneira prioritaria nas zonas rurais do municipio.
Ordenanza de terrazas
O pleno de Ames tratará tamén as alegacións e maila aprobación definitiva da ordenanza reguladora da ocupación do dominio público e espazos privados de uso público por terrazas e elementos vinculados á actividade comercial e hostalería con fins non festivos. No pleno do 29 de decembro de 2020 aprobouse se xeito provisional dita ordenanza e someteuse a exposición pública por prazo de 30 días hábiles a efecto de exame e alegacións.
Durante este período foron presentadas 3 alegacións: unha polo grupo municipal do Partido Popular; a segunda por Jorge López Pena, en representación da Xuntanza de Empresarios de Ames; e a terceira por David Dopazo Mella como membro da Asociación Provincial de Empresarios de Hostalaría e Aloxamento de Santiago. Examinadas as alegacións polo servizo municipal de urbanismo propúxose a desestimación das alegacións de David Dopazo Mella e a estimación parcial da alegación do grupo municipal popular e de Jorge López Penas, en representación da xuntanza de empresarios de Ames.
Pavimentación de accesos ao lugar de Ventosa
O proxecto de pavimentación de accesos no lugar de Ventosa está incluído no POS+ 2019, aprobado polo Pleno o 18 de decembro de 2018. Unha vez remitido o expediente á Deputación Provincial da Coruña, o organismo provincial informou da necesidade de acreditar dende o punto de vista técnico que o proxecto cumpre os requirimentos do permiso de Patrimonio. Esta situación motivou a redacción dun proxecto modificado que dea cumprimento as esixencias da autorización da Dirección Xeral de Patrimonio. Dito proxecto, que non incrementa o orzamento (95.009,62 euros), terá que ser aprobado pola Corporación municipal.
