Bisbarra, 6 de maio do 2024 – Aínda sen resolver o problema do xuño lúdico, o concello de Ames abre un novo conflito ao propoñer ampliar o comedor de Ventín usando o espazo do departamento de orientación.
Unha postura que ven de provocar un novo comunicado das ANPAS de Ames que comeza “poñendo en valor o importante labor que desempeñan os Departamentos de Orientación dos centros educativos, os cales xogan un papel fundamental que ás veces, por descoñecemento, non ten todo o recoñecemento que merece”.
As ANPAS denuncian que o concello de Ames traballa cos seus servizos xurídicos para ampliar o comedor escolar usando o espazo que ocupa na actualidade o Departamento de Orientación de Ventín. Unha intención á que toda a comunidade escolar se opón.
Esta oposición trasladóuselle ao concello tanto no Consello Escolar Municipal como no Consello Escolar do Centro; en este último todos os participantes votaron en contra do plan excepto o representante do equipo de goberno.
As razóns dos pais son a falta dun espazo alternativo para o Departamento de Orientación xa que é precisamente a saturación do centro a que xustifica a construción dun novo CEIP no Milladoiro.
Tamén poñen sobre a mesa o Informe xurídico da Consellería de Educación que indica que non se pode realizar este cambio. Dende as ANPAS instan ao Concello de Ames a “considerar solucións alternativas para a ampliación do comedor do CEP de Ventín que non impliquen deixar sen espazo ao Departamentos de Orientación dese centro”.