Ames, 23 de marzo do 2021 – A Deputación da Coruña pasa a sumir todas as competencias de Ames en materia de inspección de Imposto de Actividades Económicas.
O deputado de Economía e Facenda, Antonio Leira, e o alcalde de Ames, José Miñones, asinaron un convenio a través do cal o ente provincial asume todas as funcións, atribucións e posibles procedementos sancionadores relacionados co IAE.
Deste xeito, correspóndelle á Unidade de Inspección da Deputación a instrución e resolución dos expedientes de inspección e sancionadores do IAE. Pola súa banda, o Concello debe ofrecer a súa colaboración no desempeño destas tarefas cun funcionario do cadro de persoal. Tamén poderá recadar os apoios externos que lle solicite a Deputación a través de empresas colaboradoras ou outras fórmulas que considere.
Según o o deputado de Economía e Facenda, Antonio Leira “Este acordo permitirá mellorar a xestión municipal, reducindo ademais a taxa que ten que aboar o Concello pola recadación líquida obtida na inspección”. Na actualidade, 82 concellos da provincia delegaron o imposto ao ente provincial.
A concelleira de Economía e Facenda, Genma Otero, destaca que “con este convenio volvemos a poñer en valor o traballo conxunto e a colaboración entre administracións coa Deputación da Coruña, avanzando na mellora dos modelos de xestión tributaria, e conseguindo ademais a redución á metade da taxa que abona o Concello pola recadación derivada da inspección do IAE”.