Bisbarra, 4 de outubro do 2023 – O Bloque Nacionalista Galego en Ames e Espazo Común veñen de solicitar un pleno extraordinario para tratar a recollida de lixo no concello e a situación da Mancomunidade Serra do Barbanza.
Os solicitantes explican que a petición chega pola “ausencia de información e a necesidade de aclarar as xestións realizadas polo alcalde Blas García coa intención de adherir ao Concello de Ames á Mancomunidade Serra do Barbanza como membro de pleno dereito”.
O pasado mes de setembro finalizou o contrato entre a Mancomunidade e a empresa concesionaria da recollida do lixo (FCC). En consecuencia, o contrato permanece nunha situación de prórroga que preocupa aos traballadores e traballadoras da planta e as súa familias, ante a negativa de FCC a seguir prestando o servizo nas actuais condicións laborais e ambientais.
Escarlata Pampín e Luisa Feijoo, en representación de BNG e Espazo Común, presentaron a solicitude de Pleno Extraordinario no rexistro municipal de Ames, que deberá celebrarse neste mes de outubro.
O interese do Grupo Municipal BNG pola Mancomunidade remóntase xa a varios mandatos nos que sempre apostou por este modelo; neste senso, as concelleiras Escarlata Pampín e Rosalía Seijas participaron nunha xuntanza en Muros con representantes do BNG dos diferentes concellos pertencentes á Mancomunidade.
