O Pino, 21 de xaneiro do 2021 – O Psoe do Pino anuncia que presentará alegacións aos orzamentos municipais por vulnerar o ordenamento xurídico.
Casa do concello do Pino
A postura do Psoe xa foi avanzada no último pleno do Pino. Na sesión os orzamentos recibiron seis votos a favor do Partido Popular, dúas abstencións de BNG e 3 votos en contra dos socialistas polo que agora están en fase de exposición pública.
O voceiro socialista, Oscar Vilar, denuncia o escaso marxe de tempo co que contaron para estudar o expediente ”apenas tivemos 48 horas para unha revisión inicial, e iso que estamos a falar do asunto máis importante que se trata, ou se debería tratar, en calquera concello cada ano. Por responsabilidade e pola función de control que nos corresponde era, e segue sendo, máis que suficiente este motivo para xustificar o noso voto en contra”.
Agora, unha vez revisado e estudado o documento, consideran que o Orzamento do exercicio 2021 do Pino contén defectos de forma, está incompleto, e, que incluso podería estar a vulnerar o ordenamento xurídico no referente ao cadro de persoal e no anexo relacionado coas subvencións nominativas.
Así mesmo, tamén denuncian que o apartado de investimentos reais está incompleto ao non indicar os proxectos de inversión que se prevén realizar durante este exercicio económico, “en contra do que indica e ordena a Lei Reguladora das Facendas Locais”, apuntan.
