Bisbarra, 15 de setembro do 2018 – A Plataforma Mina Touro O Pino NON ven de presentar distintas queixas e peticións relativas ao funcionamento das administracións.
A Plataforma Mina Touro O Pino NON reclama en primeiro lugar que se publiquen nas páxinas web correspondentes a “información relativa aos actos de xestión administrativa con repercusión económica e orzamentaria que se refiren ás retribucións percibidas anualmente polos altos cargos e máximos responsables das entidades, as indemnizacións percibidas e, no seu caso, con ocasión do abandono do cargo” tal como obriga a lei de transparencia e bo goberno.
En segundo queixa o colectivo presentou queixas ante Saúde Pública, concellos, Seprona e Consellería de Medio Ambiente solicitando análises das augas de consumo humano en todas as captacións, en depuradora e en saída en billa. Solicitan así mesmo que os resultados de ditas analíticas se publiquen nas páxinas web de cada un dos concellos coa periodicidade coa que se realicen, se manteñan os libros de rexistro de queixas por malos olores ó día nos Concellos afectados e se tramiten as mesmas no prazo máximo dunha hora e o establecemento dunha estación móvil de medición de calidade do aire con carácter permanente nas zonas onde diariamente os veciños e veciñas veñen sufrindo estes cheiros e que nada teñen que ver, por suposto, coa actividade agraria.
Finalmente a Plataforma quere coñecer os informes que, según os medios de comunicación, a empresa promotora do proxecto mineiro presentou recentemente ante a administración como resposta as alegacións. Os veciños lembran que presentaron en prazo as alegacións pertinentes sen ter recibido ningunha resposta sobre as mesmas. Solicitan que se fagan públicos e se poñan a disposición de todas as persoas que se persoaron ou se queiran persoar no procedemento en tanto non recaia resolución definitiva, así como do traslado da resposta ás alegacións emitidas pola promotora.
