Compostela, 6 de setembro do 2018 – O Ministerio de Transición Ecolóxica desbota definitivamente a localización do Souto para a futura EDAR.
O Ministerio asume de este xeito o compromiso de viabilizar a localización alternativa da Silvouta, pechando definitivamente a porta a do Souto. O confirmou o director xeral da Auga, Manuel Menéndez, na reunión que mantivo en Madrid co alcalde, Martiño Noriega, e co concelleiro de Medio Ambiente e Convivencia, Xan Duro.
O alcalde explicou ao remate da xuntanza que “o Ministerio non vai impoñer unha localización que foi desbotada por acordo do Pleno da Corporación, e a partir de agora todas as enerxías concentraranse en viabilizar a opción da Silvouta. O Concello e a Dirección Xeral de Augas traballarán no intercambio de información para elaborar un documento ambiental inicial, o primeiro paso para que a nova EDAR de Santiago se constrúa na mesma localización que a actual depuradora da Silvouta”.
O alcalde enadiu que unha vez tomada esta decisión éntrase no tempo do traballo técnico que arranxe o problema canto antes. O director xeral da Auga tamén se mostrou disposto a tramitar o estudo de impacto ambiental simplificado, tal e como viña defendendo o Goberno local. A maiores, confirmouse que o prazo para a xustificación dos fondos europeos remata a finais de 2023. O alcalde reiterou que, en todo caso, “a comparativa de prezos analizada na reunión volve demostrar que a da Silvouta é unha mellor opción dende o punto de vista económico, pero, sobre todo, éo desde o punto de vista do impacto ambiental”.
