A Estrada, 13 de xunho do 2022 – O concello da Estrada recupera a normalidade das Festas de san Paio des pois de dous anos nas que estiveron condicionada pola crise sanitaria.
O San Paio 2022 foi presentado polo concelleiro de eventos, Gonzalo Louzao, xunto co alcalde da Estrada, José López. Celebraranse do 23 ao 27 de este mes de xuño e contarán con catro grandes concertos, catro das mellores orquestras e actividades a pé de rúa durante o día “para que desfrute toda a veciñanza”.
Gonzalo Louzao, asegurou que o cartel desta edición, obra da ilustradora estradense Sara Valcárcel, recolle “á perfección” a idea do programa das festas, co que se busca “que xente de todas as xeracións volva gozar coma antes”.
Louzao engadiu que o obxectivo é que “o pobo sexa en sí unha auténtica festa”, empregando varios espazos públicos como a Praza do Concello que acollerá os concertos, a zona das atraccións estará na Praza da Feira, na Praza do Mercado terán lugar as actividades infantís e na Praza de Galicia estarán ubicadas as orquestras, salvo a Panorama que o fará na Praza do Concello.
Pregoeiro estradense
O pregoeiro desta edición será o actor e humorista David Amor, afincado na parroquia de Arca, continuando coa premisa do Concello de que sexa unha persoa que resida no municipio e realice o pregón “en ton humorístico”, apuntou Louzao.
Para finalizar, o edil destacou a “importante repercusión que terán os festexos na economía local” e engadiu que durante todos os días do San Paio as actividades rematarán antes das tres da madrugada e non haberá control de accesos nin limitacións de aforos.
Pola súa banda, o alcalde, José López, quixo agradecer na súa intervención a implicación de todas as persoas e institucións coma a Xunta de Galicia ou a Deputación de Pontevedra que participaron na organización das festas, algo que supuxo “un reto para o Concello” ao decidir non contar con aportacións económicas de veciños nin de establecementos “debido á situación complexa que estamos a vivir”.
López engadiu que estes festexos permitirán “poñer en valor a recuperación que se está a facer dos espazos urbanos” e animou a toda a veciñanza estradense a gozar do San Paio e apoiar a cultura “sen medo”.
Programación
O primeiro que se recuperará este ano será a tradicional sardiñada de San Xoán o 23 de xuño, que se celebrará no aparcadoiro do Teatro Principal e repartirá 500 quilos de sardiñas de balde doadas polas peixerías Chedas, Blanco, Pinche, Rafa Carbia e Fran. Tamén volverán a celebrarse eventos deportivos coma a carreira Nocturna Estradense, a Festa da Bicicleta e os torneos 3×3 de baloncesto e fútbol.
No eido musical, as festas estarán marcadas polos concertos de Baiuca, Treixadura -que presentarán na Estrada o seu novo disco “Camiño Longo”-, Xoel López e Henry Méndez.
Na parte das formacións locais estarán as bandas de música Cultural e Municipal da Estrada, a Banda de Gaitas de Barbude ou a agrupación Tequexetéldere.
Completarán o cartel as orquestras Panorama, El Combo Dominicano, Cinema e Galilea.
Programación por días
Tedes toda a programación por días na web do concello
