Bisbarra, 11 de febreiro do 2022 – A Deputación da Coruña pecha hoxe venres a recepción de Plans de Obras e Servizos dos concellos e moitos apuraron o tempo ata o último día.
O proceso para acadar o financiamento da Deputación a través do Plan Único abriuse no mes de novembro pasado. Aínda con todo ese tempo moitos concellos non levaron a pleno as propostas ata esta mesma semana, en algún caso ata onte mesmo.
A Baña
A Baña inclúe entre os proxectos unha plataforma para a numeración dixital das vivendas e obras por 112.000 euros. A iniciativa ten como obxectivo solucionar os problemas co catastro e o Instituo Nacional de Estadística pola falta de numeración de moitas vivendas.
A partida reservada a gastos correntes é de 119.000 euros e 14.714 para reducir débeda cos bancos
A petición no POS+ adicional para gastos sociais ascende a 68.000 euros e os investimentos financeiramente sostibles do Plan Complementario ascenden a 1.400.000 euros.
O Pino
O concello do Pino pola súa banda destinará 365.000 € do POS a obras e gasto corrente e 83.000 € para servizos sociais.
A partida do POS+ adicional destinado a gasto social repártese en 53.000 € para o servizo de axuda a domicilio, 27.000 € para reforzo de persoal e 3.000 € para emerxencia social.
Por outro lado a corporación aprobou tamén por unanimidade as obras do Plan complementario, que ascenden a 437.000 euros. En este caso a partida máis importante será a mellora da seguridade viaria de San Antón ao campo de fútbol de Reboredo (190.294 €), coa construción dunha senda peonil pola marxe dereita ata o colexio.
