Bisbarra, 5 de setembro do 2023 – O alcalde da Baña, José Antonio Pereira Gil, pídelle a Xunta de Galicia que retire os niños de velutina nos prazos previstos.
O alcalde ven de remitir un escrito, á Consellería de Medio Rural e a Seaga, no que esixe a retirada dos niños de vespas velutinas no municipio segundo os prazos estipulados pola propia administración.
O Concello da Baña expón as numerosas queixas recibidas por parte da veciñanza pola tardanza na retirada de niños de vespas velutinas no municipio. Déronse prazos superiores ao mes, cando se trata de domicilios particulares. Esta circunstancia supón un grave risco para as persoas.
Na nota, o concello lembra que a Dirección Xeral de Administración Local, con data 18 de xaneiro, indicaba que o convenio de retirada de vespas velutinas coa empresa Seaga implicaba que ditos niños, unha vez recibida a alerta no servizo 012, tería un prazo medio de 5 días hábiles. No Concello da Baña este compromiso non se está a cumprir.
Deste xeito, o Concello insiste na súa esixencia de que se tomen as medidas oportunas para o cumprimento de ditos prazos de retirada de niños de vespas velutinas.