Teo, 12 de xullo do 2021 – En menos de 24 horas a Plataforma Casalonga Limpa de Residuos recolleu as solicitudes de 600 veciños de persoarse como parte implicada no novo plan de restauración da canteira.
O pasado xoves foron entregadas as solicitudes no rexistro, a espera da resposta que dea a Xunta de Galicia. O pasado mes de setembro a Plataforma xa presentara máis de 1.000 alegacións ao anterior plan para a canteira.
A Plataforma asegura que “esgotará calquera vía legal, incluída a xudicial, para impedir que se destroce a rexeneración natural das lagoas e do seu ecosistema”. Desde o colectivo se valora positivamente o acordo dos grupos municipais sobre a defensa da estrada que bordea a canteira como ben público. A empresa Toysal pretende que sexa expropiada xa que defende a teoría de que é privada.
