Bisbarra, 6 de novembro do 2020 – As novas restricións, que entran en vigor ás 00:00 de este sábado, amplían o peche de Ames, Teo e Santiago a outros 9 concellos da bisbarra.
O perímetro pechado na contorna da capital chegará desde esta noite a Boqueixón, Oroso, Trazo, Val do Dubra e Vedra. A bisbarra ten ademais outros 3 concellos incluídos no peche: Lalín, A Estrada e Silleda. Así, en todas estas zonas, estarán permitidos o 100% dos movementos para ir a traballar, á escola, a atender coidados necesarios de menores e maiores, e todos os movementos sanitarios. E o comercio funcionará cos mesmos criterios do resto de Galicia.
Tendencia a estabilizarse
As novas restricións chegan cando parece que o número de casos comezaba a ser controlado. Na Área Sanitaria pasouse de 1348 casos o día 3 de novembro, a 1334 o día 4 e a 1338 onte día 5 o que semella unha tendencia á baixa que se consolida. Nos centros educativos non chega a ser tan clara pero tamén parece boa xa que si o día 31 o número de casos era de 153, o día tres foi de 160, o día catro 161 e onte xoves volvían a 153. O alcalde de Santiago, Xosé Sánchez Bugallo, mostraba a súa sorpresa e acataba a decisión pedindo axuda para sectores como o da hostalería
Pola sú banda o alcalde de Silleda, Manuel Cuíña, emitía unha nota de prensa na que se mostraba contrario á inclusión no seu concello entre os que pechan e o consideraba “algo desproporcionado, tendo en conta que a incidencia das dúas últimas semanas vén dada “por un brote nunha residencia de maiores, que todos lamentamos, pero que está focalizado”.
Cuíña engadía que sen os casos da residencia o concello ten menos positivos que outros municipios da contorna que non pechan e pedía que se revisara a decisión porque “cando xurdiu o da residencia se nos informou que eses casos se tomarían a parte. Agora nos atopamos con este peche perimetral, pero alguén debería explicarnos se se fai porque se toma como referencia unha área territorial, e non decir que é pola incidencia dos casos”.
Outras medidas
Ademais do peche hai novas medidas como o peche da hostalería por completo durante un mes, agás o servizo a domicilio e para recollida que si se poderá ofrecer. A práctica deportiva quedará restrinxida a deporte individual ou federado. Reducirase o aforo en establecementos culturais, que con esas limitacións poderán seguir funcionando , cines, teatros, auditorios, e outros recintos de público sentado poderán ocupar o 50% de cada sala, cun límite de 30 persoas en interior e 75 en exterior.
Ademais das restricións nestas zonas, en toda Galicia limítase as saídas de usuarios fóra das residencias, preservando de momento as visitas dos familiares nas condicións de distanciamento e hixiene establecidas desde hai meses. Incremento das limitacións de aforo en grandes establecementos comerciais, de xeito que nas zonas comúns só poderá ocuparse un terzo do máximo, nas tendas, continúa o aforo do 50 % como ata agora.
En toda Galicia, redúcese tamén o aforo no transporte público non escolar. O transporte urbano contará cun máximo do 50% dos asentos; e o transporte interurbano co 50%”.
