Compostela, 14 de outubro do 2020 – A Real Filharmonía de Galicia ofrece esta semana dous concertos nos que participa a violinista Ellinor D´ Melon.
Ellinor D´ Melon comezou a estudar violín aos dous anos e con 20 xa goza dunha importante carreira internacional. Debutou baixo a batuta de directores tan respectados como Zubin Mehta, Vladimir Spivakov, Jaime Martín ou Zakhar Bron, entre outros. Os seus crecentes compromisos levárona a salas de concerto tan prestixiosas como a Philharmonie de Berlín, Teatro Mariinsky de San Petersburgo, Auditorio Nacional de Madrid, Concertgebouw en Ámsterdam, Philharmonie de Colonia, Tonhalle de Zúric, Sala Verdi de Milán, Baltic Hall de Gdansk, Royal Albert Hall de Londres… Recibiu numerosos premios en competicións internacionais en Berlín, Rusia, Polonia e Estados Unidos. Toca un violín Giovanni Baptista Guadagnini do ano 1743, cedido por un doante anónimo de Londres.
Con Maximino Zumalave e en streaming
Baixo a batuta do seu director asociado, o Mestre compostelán Maximino Zumalave, o primeiro dos concertos será este xoves, 15 de outubro, no Auditorio de Galicia (Santiago), ás 20:30 horas. Poderase seguir ademais en directo por streaming a través da canle de Youtube e do Facebook da RFG.
O venres 16 a orquestra desprazarase a Vigo, onde tocará no Auditorio Afundación da cidade (20:00 horas), no marco da colaboración que a RFG mantén coa Sociedade Filarmónica de Vigo e Afundación.
O programa, o segundo desta tempada de “Emocións naturais”, leva por título “Inacabada”, en relación á Sinfonía Inacabada de Franz Schubert (1797-1828), que a Real Filharmonía de Galicia tocará neste concerto. Esta sinfonía, escrita no ano 1822, non foi descuberta ata varios anos despois da morte do compositor e só consta de dous movementos.
A RFG achegará ao público tamén o Concerto para violín nº 1 do compositor alemán Max Bruch (1838-1920), a súa peza máis coñecida e unha das máis populares dentro do repertorio romántico alemán.