Compostela, 05 de xaneiro do 2023 – O IDEGA, dependente da USC, e o CES Galicia veñen de outorgar o IX Premio Valentín Paz Andrade a traballos sobre a fiscalidade da enerxía eólica e a vulnerabilidade socioeconómica de Galicia.
Os premios Valentín Paz Andrade distinguen os traballos de investigación que contribúen ao coñecemento da realidade económica e social de Galicia e ao establecemento das mellores políticas para o benestar da cidadanía.
Esta tese, defendida na USC e dirixida polos profesores María del Carmen Sánchez Carreira e Paulo Jorge Reis Mourão, permite un maior coñecemento da vulnerabilidade socioeconómica en Galicia e das súas implicacións para os ámbitos educativo e laboral, alén de incidir nas políticas aplicadas neste eido e os seus efectos.
Por outra banda na modalidade de “Traballos publicados en revistas científicas ou en editoriais recoñecidas” fíxose co galardón o artigo ‘Renewable energy taxes and environmental impacts: A critical reflection from the wind tax in Spain’, do que son autoras as profesoras da USC Rosa Mª Regueiro Ferreira e María Cadaval Sampedro.
O informe foi publicado na revista Energy and environment e aborda a fiscalidade da actividade eólica establecendo unha análise comparada da situación en Galicia coa doutras comunidades autónomas. Ademais, caracteriza socioeconomicamente este tipo de tributación e avalía a idoneidade desta fiscalidade para gravar os impactos ambientais asociados a esta xeración de enerxía.
Na presente edición, da que o xurado salienta a concorrencia dun gran número de traballos de gran calidade científica, outorgouse tamén un accésit a unha investigación sobre o aproveitamento dos recursos micolóxicos nos montes en man común en Galicia e sobre a súa potencial contribución ao desenvolvemento sostible do rural galego. O artigo, titulado ‘Community forest and mushrooms: Collective action initiatives in rural areas of Galicia’, e asinado por Damián Copena, David Pérez Neira, Alfredo Macías Vazquez e Xavier Simón, está publicado na revista Forest Policy and Economics.
Presidido polo reitor da USC, o tribunal motivou as súas decisións, tomadas por unanimidade, na calidade científica dos traballos, na actualidade e relevancia da temática que abordan e na contribución dos resultados á mellor toma de decisións para o desenvolvemento socioeconómico de Galicia. A relación completa de investigacións premiadas en anteriores edicións está dispoñible na web do IDEGA.
