Os María Casares rexistran a maior participación da súa historia

Bisbarra, 24 de xaneiro do 2024 – Os Premios de Teatro María Casares rexistran a maior participación da súa historia ao inscribírense 47 espectáculos e máis de 350 profesionais.

Os galardóns chegan este ano a súa 28ª edición. Este récord na inscricións acádase na segunda edición na que os galardóns incrementaron os seus apartados, xa que no 2023 as bases foron modificadas para ampliar o certame ao crear dúas novas categorías: dirección de movemento e espectáculo de monicreques, obxectos e figuras animadas.

A Asociación de Actores e Actrices de Galicia (AAAG), asociación sindical que organiza os galardóns dende a súa posta en marcha en 1997 coa colaboración tradicional de institucións e entidades como a Xunta de Galicia, o Concello da Coruña, a Deputación da Coruña, o Padroado de Cultura do Concello de Narón, a Fundación Aisge, a Fundación SGAE ou Gadis, abre hoxe a primeira quenda de votacións.

Dela sairá a relación de finalistas que optarán aos 16 galardóns nos que se dividen os María Casares: espectáculo, espectáculo infantil, espectáculo de monicreques, obxectos e figuras animadas, dirección, dirección de movemento, actriz protagonista, actor protagonista, actriz secundaria, actor secundario, texto orixinal, adaptación-tradución, espazo sonoro, espazo escénico, iluminación, maquillaxe e vestiario.

A gala de entrega se celebrará o xoves 21 de marzo no Teatro Rosalía Castro da Coruña. Preto de 500 persoas pertencentes ao sector escénico están chamadas a emitir o seus votos de forma telemática a través da web da Asociación de Actores e Actrices de Galicia (AAAG) até o venres 9 de febreiro nesta primeira rolda de votacións.

Espectáculos inscritos nos XXVIII Premios de Teatro María Casares