Oroso, 25 de marzo do 2022 – O Concello de Oroso pechou o ano 2021 cun remanente de tesourería de 1.735.052,23 euros que será investido en diferentes obras e proxectos.
Oroso destinará de esa cantidade un total de 1.393.901,16 euros a investimentos. Destacan o remate das obras do novo auditorio e ampliación do centro cultural; a posta en marcha do carril-bici desde Sigüeiro ata a estación de Oroso; traballos de asfaltado en Ponte Carollo, e melloras no abastecemento en San Román, o lugar da Estación e Villalbarro Mariñaos.
O concello construirá tamén unhas novas gradas no campo de fútbol de Oroso e renovará o alumeado en Alexandre Bóveda e a senda peonil de Estación (Oroso), ademais de destinar outras partidas á finalización de obras iniciadas o ano pasado.
Outros 300.000 euros do remanente, que será debatido nun pleno municipal a próxima semana, destinaranse a gasto corrente, principalmente a axudas e subvencións a asociacións e clubes deportivos, entidades culturais e Protección Civil.
O alcalde, Luís Rey, declarou que “Temos un concello saneado, o que nos permite investir o remanente en obras, moitas delas nas parroquias e o rural, co único obxectivo de mellorar os servizos e infraestruturas de Oroso e, en definitiva, a vida dos nosos veciños”.
