Bisbarra, 28 de febreiro do 2024 – A Deputación da Coruña destinará este ano máis de 900.000 euros á contratación de técnicos deportivos en concellos de toda a provincia.
O responsable da área de Deportes da Deputación, Antonio Leira, visitou o concello de Oroso para presentar estes investimentos que no que atinxe á bisbarra de Compostela supoñen 270.000 euros.
Leira estivo acompañado polo alcalde de Oroso, Alex Doval, os concelleiros Luís Rey e Jesús Fernández e o técnico de Deportes municipal, Manuel Cruz. A visita centrouse no centro deportivo Juanito Amigo, onde o deputado supervisou algunhas das actividades deportivas que se desenvolven no municipio.
Leira destacou que a Deputación destina este ano 904.000 euros para financiar este programa, que permitirá a 67 concellos da provincia, vinte deles na comarca de Compostela, contratar ou manter no seu cadro de persoal a técnicos deportivos “que teñen como misión dinamizar a actividade deportiva dos municipios e planificar un calendario de actividades para todos os públicos”.
O deputado sinalou que se trata dun programa que “contribúe de maneira directa á xeración de 62 empregos noutros tantos municipios da provincia” e, ademais, “facilita a realización de programacións deportivas con actividades variadas e estables, promovendo a práctica do deporte e a actividade física entre os veciños e veciñas de todas as idades nos concellos da provincia”.
“O compromiso da Deputación co deporte en Oroso é moi claro”, afirmou o deputado, que é tamén é concelleiro na localidade, destacando o apoio provincial a numerosos clubs e entidades deportivas do municipio e investimentos importantes como os 300.000 euros investidos para a mellora do campo de fútbol ou os 400.000 comprometidos para o novo pavillón polideportivo de Sigüeiro.
O alcalde, Alex Doval, agradeceu a cooperación da Deputación “que é o paraugas dos concellos máis pequenos para o sostemento do posto de traballo dun técnico de Deportes que nos axuda a organizar todas as actividades e eventos deportivos que organiza o municipio”.
