Compostela, 22 de outubro do 2018 – crónica Íñigo Caínzos / Lindeiros – O Monbus Obradoiro non puido contra todo un campión de Europa como o Real Madrid (73-86).
O Real Madrid aplacou a rebelión obradoirista, cun partido moi serio, ben xogado desde o inicio, cando Santi Yusta e Antonhy Randolph dispararon ao Real Madrid con 7 e 8 puntos respectivamente. Os de Laso colleron pronto o control do encontro, baixo a batuta de Facundo Campazzo (seis asistencias) e non a soltaron ata o final. O campión de Liga e de Europa, recente gañador da Supercopa Endesa, soubo xestionar moi ben as distancias durante todo o choque.
Imaxe> ACB / X. Cortizo
Cifras igualadas en porcentaxe de tiro de dous e de tres
Nun partido igualado en termos de porcentaxes, tanto en tiros de dous como de tres, a diferenza final estivo na liña de persoal. O combinado branco anotou 27 de 34 encontros. O Monbus Obradoiro quedou en 14 de 20. Trece tiros libres anotados de diferenza. Trece foron os puntos de distancia entre obradoiristas e madridistas ao termo do encontro.
O Real Madrid gaña a batalla na pintura
A batalla na pintura tamén resultou clave para decantar a balanza en favor dos de Pablo Laso. Kuzmic impuxo os seus centrímetros para atrapar nove balóns preto do aro (sete en defensa e dous en ataque), e Gabriel Deck e Santiago Yusta batallaron ata a extenuación para apuntarse sete e seis capturas respectivamente. As segundas oportunidades nutriron de puntos ao Real Madrid (dezasete, fronte aos sete do Monbus Obradoiro).
Imaxe> ACB / X. Cortizo
Os obradoiristas non se renderon en defensa
Non se renderon os de Moncho Fernández, menos inspirados que noutras ocasións en ataque, pero moi traballadores en defensa. Eran conscientes os xogadores galegos de que o Madrid de Laso é un equipo que voa cada vez que ten unha oportunidade, que castiga moito as imprecisións desangrando aos seus rivais. Neste sentido, a posta do Monbus Obradoiro en escena foi moi notable, reducindo ao máximo as perdas (9), e freando unha e outra vez os contragolpes do Madrid (só dous puntos).
Obst e Brodziansky, máis valorados
Nin a avultada desvantaxe no marcador nin a elevada carga de persoais amedrentaron ao Monbus Obradoiro. Andy Obst bombardeou o aro madridista desde a distancia (17 puntos) e Brodziansky buscou con insistencia a canastra por dentro (14 tantos). Ambos foron os referentes en valoración do Monbus Obradoiro, con 19 créditos. Vibrou Sar coa entrega de Pozas, índose ao chan para loitar un balón perdendo por 15, ou coa rabia de Spires, que se colgou do aro habilitado por Sàbat.
Imaxe> ACB / X. Cortizo
A afección despediu en pé ao equipo polo seu esforzo
Por iso, pola coraxe mostrada polos doce gladiadores galegos fronte ao xigante campión madridista, a afección despediu posta en pé aos seus xogadores, a seis días vista do especial derbi galego en Lugo contra o Cafés Candeas Breogán (sábado,18:00)
