Ames, 23 de xuño do 2017 – Un total de vinte rapaces, do club de atletismo Millaraio, participarán esta fin de semana no IV Campionato de España de Atletismo Infantil por Equipos, en Puertollano.
O salón de plenos acoleu a presentación da man do alcalde e concelleiro de Deportes, José Miñones, e do presidente do club Millaraio, José David García Arcos.
E a cuarta vez que o Millaraio participa en este campionato e ainda que comezou so con equipo masculino xa o ano pasado levou tamén un feminino o que da mostra do crecemento do club.O presidente do Millaraio García Arcos quixo destacar a concepción do campionato como un premio pola constancia e esforzo dos atletas. “Para eles, o campionato é un premio, evidentemente vanse a esforzar e a dar o mellor de si, mais sen esixencias. O importante é que aproveiten a experiencia. Para nós o importante non é a competitividade, senón que primen o esforzo e o compañeirismo por riba das demais cousas”.
Pola súa parte, o alcalde e concelleiro de Deportes, José Miñones destacou o traballo que o Concello está a realizar para pór en valor e visivilizar outros deportes, alén do fútbol. “Desde que entramos no goberno municipal quixemos apoiar outro tipo de deportes, máis alá do fútbol, a través do Consello Municipal de Deportes. Miñones tamén puxo en valor o feito de que haxa empresas privadas que apoien o deporte local. “As entidades privadas son chave para apoiar o deporte. Ao Concello gustaríalle que as empresas privadas estivesen detrás de cada club, xa que iso evitaría que o Concello tivese que asumir determinados custes a través de subvencións, e podería destinar o diñeiro para a construción de novas instalacións como, por exemplo, unha pista de atletismo”.
Por último, García Arcos agradeceu o apoio brindado polo Concello e tamén pola empresa privada Addomo, de arquitectura modular, que é a nova patrocinadora do club. “Sen a súa axuda, este tipo de viaxes tornaríanse moi complicados de realizar, polos elevados gastos que supoñen para o club”, afirmou o presidente do Millaraio.
Un campionato diferente
Este campionato presenta un formato diferente ao da maioría de eventos deste tipo. As súas probas son catro concursos e catro carreiras, cos que se prima que as e os atletas non se especialicen nunha soa proba. “Un formato que se axusta á perfección á filosofía do club Millaraio, xa que nós procuramos que as rapazas e os rapaces proben todas as disciplinas posibles, e non se especialicen nestas idades nun só tipo de proba”, afirma García Arcos.
O campionato se desenvolverá en Puertollano o sábado de tarde e o domingo pola mañá. Nas carreiras as probas serán: 80 metros lisos, 80 metros vallas, mil metros, e dous mil de marcha. Nos concursos hai lonxitude, altura, xavelina e peso. Cada participante terá que competir nunha proba de carreiras e noutra de concurso. A maiores, varios atletas realizarán unha proba de relevos.
