Melide, 22 de xaneiro do 2020 – O Concello de Melide vén de remitir na unha nova solicitude á Consellería de Infraestruturas e Mobilidade para que revise o estado do firme da AC-840 ao seu paso pola vila.
Non é a primeira vez que o concello realiza esta petición xa que o pasado mes de novembro reclamou tamén o arranxo da AC-840.
Trátase dunha estrada de competencia autonómica que vertebra o núcleo urbano de Melide, une a ronda da Coruña coa ronda de Pontevedra, dous viarios fundamentais de entrada e saída que soportan máis de 3.500 vehículos de media cada día. O alto volume de tráfico rodado unido ao paso do tempo, fai que o firme en moitas zonas esté totalmente afundido poñendo en perigo a seguridade de condutores e viandantes.
Por estas razóns, dende o Concello de Melide volveron a reiterar á Axencia Galega de Infraestruturas a necesidade de arranxar o firme da AC-840 ao seu paso pola vila. No escrito remitido inclúese un completo dosier fotográfico evidenciando a mala conservación da estrada, unha situación que se cualifica dende o ente local como moi grave e que supón un perigo para veciños e visitantes.
