Melide, 23 de xullo do 2020 – Melide non terá eventos deportivos durante o vindeiro mes de agosto para previr riscos sanitarios derivados do Coronavirus.
A decisión, dialogada entre as diferentes asociacións, clubes e a Concellería de Deportes de Melide, chega despois de ver a situación actual onde aínda é necesario evitar as aglomeracións e o contacto físico.
Seguindo a mesma liña que se emprendeu a comezos do mes de marzo cando a Concellería de Deportes decidiu suspender a actividade das escolas deportivas na que participaban máis de medio milleiro de persoas, o Concello de Melide considera que os eventos que se viñan celebrando na vila con numerosa participación poderían supoñer un risco para a saúde.
O campionato de fútbol sala de agosto é unha das cancelacións. Celebrábase durante todo o mes no polideportivo municipal organizado polo Clube Cire de Melide e este ano chegaría a súa edición corenta.
Tampouco se celebrará o día da bicicleta, iniciativa do Clube Ciclista melidense, que con data de 15 de agosto era un dos eventos deportivos familiares máis multitudinarios da vila.
“Agradecemos a todas as asociacións e colectivos deportivos de Melide a súa responsabilidade e implicación coa actividade física e coa saúde dos veciños e veciñas, máis este ano non será posible debido á situación que estamos a vivir celebrar estes eventos. Parécenos que é a mellor decisión e tan só será unha paréntese, xa que deporte e benestar volverán a estar collidos da man no próximo ano 2021. Dende o goberno local continuaremos colaborando para que os eventos deportivos que xa gozaban de éxito en edicións anteriores no 2021 conten con máis apoio e participación”, conclúe Jose A. Prado, concelleiro de Deportes do Concello de Melide.