Compostela, 3 de maio do 2018 – A Confederación Intersindical Galega, CIG, ven emitir un comunicado como sindicato maioritario na Escola Municipal de Música de Compostela no que mostra a súa preocupación pola falta de información sobre o futuro laboral dos profesores.
A CIG agarda que o Concello de Santiago manteña o seu compromiso de garantir a continuidade do persoal da Escola de Música Municipal pero explica que as portas do mes de xullo os docentes non teñen información sobre se poderán manter o posto de traballo.
Tras varias reunións mantidas co concelleiro de Educación de Santiago, Manuel Dios, e ante a situación de incerteza que se abre despois de que a actual adxudicataria da Escola Municipal de Música non se presente ao concurso para a renovación do contrato, a CIG amosa a súa preocupación polo futuro dos 24 empregados e empregadas que conforman até agora o cadro de persoal deste centro.
O secretario comarcal do sindicato, Rubén Fernández indica que “Algúns deles levan arredor de 15 anos de servizo nunha escola con grande aceptación social, como o demostra as cifras de matrícula que posúe, con preto de medio milleiro de alumnado, nestes intres, a pouco máis dun mes de que finalice o curso, o persoal docente e de servizos non sabe se vai continuar traballando en setembro. A CIG lembra que no seu día asinouse un acordo que garante a subrogación dos profesores polo que agarda que se respecte por parte da nova concesionaria.
