Oroso, 29 de marzo do 2019 – A agrupación local do Psoe de Oroso decidiu en asemblea renovar a confianza en Manuel Mirás, actual alcalde, para que sexa o candidato nas eleccións municipais do mes de Maio.
Manuel Mirás foi elixido por aclamación durante a asemblea ordinaria celebrada este mércores, 27 de marzo, na sede da Agrupación Socialista de Oroso e á que acudiron multitude de simpatizantes e afiliados do partido. O alcalde e xa candidato dixo que se presenta “por responsabilidade e porque manteño intacta a ilusión por traballar e por seguir facendo de Oroso un referente”. Mirás, agradeceu a todos os presentes a confianza depositada na súa persoa “para seguir liderando este proxecto”.
A asemblea transcorreu nun ambiente moi emotivo, no que moitos dos presentes tiveron a ben pronunciar unhas palabras de recoñecemento ao traballo desenvolvido polo candidato socialista durante todos estes anos ao fronte do Concello de Oroso. Do mesmo xeito, a súa proclamación foi recibida entre aplausos.
Nas vindeiras semanas Mirás dará a coñecer os integrantes da súa candidatura, na que xa está a traballar dende hai días.
