Bisbarra, 15 de xullo do 2022 – O Plan Único da Deputación destina 275.000 euros para financiar a mellora de sete camiños e vías municipais de Padrón.
Os camiños padroneses que se verán arranxados son os do Couto ó Retén, pistas en Tarrío, a travesía Compostela a Luans, de Iria a Extramundi, de Cruces a Bascuas e na Escravitude.
No camiño do Couto ó Retén o investimento chega a 68.181 euros e permitirá mellorar a capa de rodaxe, pavimentar tres ramais e, previamente aos traballos de asfaltado, a execución dunha rede para abastecemento de auga potable.
Para as pistas en Tarrío, na parroquia de Cruces, o orzamento é de 94.775 euros, dos que a Deputación aporta 82.775 euros e o Concello 12.000 euros. As actuación realizaranse en dous tramos, nos que se executará un pavimento de adoquíns de granito gris e dous colectores de saneamento.
O proxecto para a pavimentación da travesía Compostela a Luans e de Iria a Extramundi conta cun orzamento de 59.971 euros, dos que a Deputación aporta 51.668 euros e o Concello a parte restante. No tramo de Iria a Extramundi tamén se prevé a canalización para iluminación.
Por último, a actuación que permitirá renovar a capa de rodaxe nos camiños de Cruces a Bascuas e na Escravitude, ambos na parroquia de Cruces, implicará un investimento de 57.000 euros, dos que a institución provincial asume 48.000 euros.