Teo, 17 de agosto do 2021 – Nin é tan complicado entrar nin tan difícil salir como na película pero Teo ten o seu propio labirinto de millo.
A concelleira de Turismo, María López, inaugurou este labirinto de millo deseñado para que crianzas e maiores desfruten da entrañable sensación de perderse nel.
O obxectivo é que as persoas que o visiten gocen dunha actividade en contacto coa natureza e dunha xornada distinta perdéndose e buscando a saída entre mazarocas.
A actividade segue a intención da concellaría de programar actividades no medio natural. Na actualidade este tipo de eventos teñen unha gran demanda entre a poboación ao realizárense en espazos exteriores e abertos, considerados seguros ante a situación sanitaria.
A leira de millo, un cultivo maioritario en Galicia, representa unha homenaxe a todos os traballadores do sector primario e visibiliza que, ademais da utilización propiamente forraxeira desta planta, pode ser tamén un espazo para o esparexemento, o xogo e o ocio de toda a poboación.
As persoas que se acheguen ao labirinto encontrarán unha parcela de arredor dunha hectárea plantada a millo, á que poderán acceder de forma libre e gratuíta, cunha entrada e carreiros intercomunicados no seu interior que levarán a unha única saída. A sensación de pasear polo seu interior e estar perdido podendo ver unicamente plantas de millo e o ceo é ben curiosa e impresionante.
Ademais, nas fins de semana, na entrada ao recinto, haberá servizo de cantina, máis concretamente os venres entre as 16 e as 20 h e sábados e domingos de 12 a 20 h. Tamén haberá, ao seu carón, unha zona habilitada para que as persoas poidan desfrutar dunha merenda campestre.
Igualmente, os xoves e venres de setembro haberá unha escape room como actividade complementaria, así como tamén está previsto que sirva de emprazamento para unha Festa de Apego durante o mes de setembro, actividades que se irán programando e anunciando na web municipal e redes sociais, tanto do Concello como da área de Turismo.
O labirinto de millo está situado nun espazo rural no lugar da Torre, na parroquia de Cacheiras.
Contará con baños públicos nas inmediacións. Entre as principais recomendacións para a súa utilización están que as crianzas deben manterse custodiadas en todo momento por responsables adultas e empregar os camiños habilitados para o paseo.
A concelleira de Turismo, María López, indica que “se trata dunha actividade turística de baixo impacto ambiental, que acollerá gratuitamente a todas as persoas que desexen desfrutar dunha xornada de lecer nun contorno natural”. Así mesmo, tamén sinala que “foi creada coidando cada detalle e agardamos que a acollida sexa moi boa por parte de teenses e visitantes”.
