Compostela, 24 de setembro do 2019 – A xunta directiva provincial do Partido Popular aprobou a nova xestora do PP de Santiago que presidirá Borja Verea.
Xunto a Borja Verea, integrarán o equipo Rosa Quintana, Marta González, Alejandro Sánchez-Brunete, Paula Prado, Pedro Puy e Evaristo Ben.
Tras agradecer o “gran traballo e dedicación” do ata hai unhas semanas presidente local, Agustín Hernández, os populares centráronse na reorganización do grupo municipal, con Alejandro Sánchez-Brunete asumindo a portavocía e María Castelao ocupando o seu posto de concelleiro. “Tras a marcha de Agustín Hernández e a reorganización do grupo municipal, agora é o momento de iniciar unha nova etapa na agrupación local”, asegurou o presidente provincial, Diego Calvo.
O traballo agora centrarase na reorganización da agrupación a nivel local, para as eleccións xerais de novembro e a preparación das eleccións autonómicas.
“Con Borja Verea facemos unha aposta importante que suma mocidade, experiencia e capacidade, xa que á fronte do partido teremos a unha persoa con total coñecemento da cidade e que, sobre todo, está disposto, con ganas e entusiasmo, a integrar un equipo gañador que merece o Partido Popular pero que, sobre todo, merecen os santiagueses”, explicou o titular provincial.
Borja Verea Fraiz
Borja Verea naceu en Santiago no ano 1980. Licenciado en Dereito pola Universidade de Deusto, é funcionario con habilitación nacional nas escalas de Secretaría – Intervención e Intervención -Tesourería. Pertence tamén ao Corpo Superior da Administración Xeral da Xunta de Galicia. Aos 31 anos foi nomeado secretario xeral técnico da Consellería de Economía e Industria.
Ademais, no Partido Popular, Verea é membro da executiva local de Santiago, da provincial e do comité executivo autonómico desde hai varios anos.
