Compostela, 20 de setembro do 2018 – O alcalde de Santiago, Martiño Noriega, inaugurou, na Casa do Cabildo, unha exposición que percorre os 170 anos de historia da Banda Municipal.
A Banda Municipal de Santiago é unha das máis antigas do panorama nacional e, logo de preto de dous séculos de vida, atópase entre as poucas que perduran dende o seu nacemento ata os nosos días. Esta mostra parte do traballo de investigación de Beatriz Cancela, cuxa tese de doutoramento culminou no libro “La Banda Municipal de Santiago. Música en las compostelanas rúas desde 1848”, editado polo Consorcio de Santiago e Andavira Editora e que se presentaba o ano pasado na cidade.
Como preludio a inauguración a Banda dou un pequeno concerto na Praza de Praterías. Xunto co alcalde estiveron no acto a comisaria da exposición, a musicóloga Beatriz Cancela Montes, a xerente do Consorcio de Santiago, Belén Hernández; e o responsable de Exposicións do organismo interadministrativo, Juan Conde.
