Compostela, 8 de outubro do 2019 O proxecto de intercambio cultural, entre Galicia, Asturias, Cantabria, e Euskadi, Camiño Escena Norte, remata esta semana en Santiago con dous espectáculos.
“Como ceniza blanca sobre una hoguera”, de La Tejedora de Sueños e o “Sagartu” de Hika Teatroa estrearan en Compostela ao mesmo tempo que dúas compañías galegas, A Panadaría e Baobab Teatro, están a facer o mesmo nas outras comunidades do norte peninsular.
Pograma
O 11 de outubro, no Salón Teatro as oito e media e cun debate ao rematar, representarase “Como ceniza blanca sobre una hoguera”, de La Tejedora de Sueños. Dous días despois, o 13 as seis e media, será a quenda de “Sagartu” de Hika Teatroa, en este caso na Praza da Quintana para poñerlle o ramo a esta primeira edición.
“Como ceniza blanca sobre una hoguera”, de Néstor Villazón (La Tejedora de Sueños, Asturias) lévanos á Zaragoza de 1485 cuns Reis Católicos que buscan unificar unha España dividida baixo o xugo da Santa Inquisición. Na súa defensa os xudeus máis ricos da cidade prepararán o asasinato do inquisidor xeral Pedro de Arbués. As súas consecuencias empezan a facerse visibles desde o comezo: Yannis e Milena, parella que dubida se pertencer ou non a esta conspiración, son detidos e encarcerados, guiando ao espectador no xuízo habitual a un herexe.
“Sagartu”, de Arantxa Iturbe e Agurtzane Intxaurraga (Hika Teatroa, Euskadi) é un espectáculo de rúa, multidisciplinar e composto por música en directo, teatro e danza. Sagartu reborda humor, alegría e vitalidade repasando todos os significados que a mazá tivo en Euskadi dende os tempos do Edén ata o presente.
Camiño Escena Norte, o proxecto
Camiño Escena Norte é un proxecto artellado arredor dun novo itinerario de intercambio cultural que toma a ruta histórica do Camiño de Santiago do Norte como referencia para unha intensa programación escénica, expandida ademais nos eidos das sinerxias sectoriais, a mediación co público ou a reflexión.
Camiño Escena Norte xorde co obxectivo de coñecer máis e mellor aos nosos veciños e veciñas, dando a posibilidade ao público de ter acceso a producións escénicas doutros territorios ás que doutra maneira non accederían. Aproveitando esta ruta cultural e histórica que nos une dende hai séculos creamos un novo camiño de cultura con espectáculos de teatro e danza, encontros, obradoiros, xornadas ou residencias de creación, no que mostrar a diversidade cultural, lingüística e de formatos e linguaxes escénicas da produción galega, asturiana, cántabra e vasca.
Este proxecto está promovido polas asociacións de produtoras escénicas de cada unha das autonomías implicadas: Escena Galega, EscenAsturias, ACEPAE (Cantabria) e Eskena (Euskadi). Está apoiado en Galicia pola Xunta de Galicia a través de AGADIC, canda as deputacións da Coruña e Lugo e a Fundación SGAE.