Compostela, 30 de marzo do 2019 – A Xunta de Goberno Local de Santiago aprobou o Plan de xestión da Cidade Histórica.
O Plan de xestión é un documento requirido pola Unesco ás Cidades Patrimonio da Humanidade. O documento nace dun proceso no que participaron asociacións de distintas áreas e profesionais de distintos ámbitos ao longo dos últimos meses.
Jorge Duarte na rolda de prensa
O concelleiro de Espazos Cidadáns, Dereito á Vivenda e Mobilidade, Jorge Duarte explicou que “este documento elaborouse de forma paralela á revisión do Plan Especial da Cidade Histórica se ben non se circunscribe exclusivamente a este ámbito. Despois de que o Pleno da Corporación rexeitara a aprobación conxunta do Plan de Xestión e do Plan Especial, acordamos seguir cos trámites que son competencia da Xunta de Goberno, como é a aprobación deste documento”. Duarte dixo tamén que “o Goberno xa ten presente o contido do Plan de Xestión en actuacións como a reforma da ordenanza que regula a ORA, ou mesmo no deseño do futuro servizo de autobuses”.
Carácter de Plan Estratéxico
Según o concelleiro o Plan de Xestión “é realmente un Plan Estratéxico que o Concello de Santiago abordou a partir dun longo proceso participativo, e que vai moito máis alá dun documento urbanístico. Despois de 25 anos de experiencia en políticas de conservación e rehabilitación, afrontamos unha forma renovadora de planificación, no que se abordan cuestións que van desde o acoplamento da cidade histórica ás novas tecnoloxías ata a promoción dun gran espazo da innovación”.
O Plan de Xestión, elaborado por un equipo redactor liderado por Juan Requejo, identificou como primeiro reto da cidade histórica “manterse como cidade viva e non converterse nun lugar non que unicamente se acumula o patrimonio para ser visitado polos turistas”. No documento apúntase a “unha perda grave da vitalidade da cidade histórica, que se deduce da perda progresiva de poboación residente e dos usos tradicionais dos inmobles e da excesiva centralidade dos sectores da hostalería e o ocio.
Os obxectivos estratéxicos que fixa o Plan de Xestión pasan, pois, por desenvolver o potencial de acollida residencial da cidade histórica e a por recuperar as actividades comerciais e culturais propias; por asegurar a conservación do patrimonio, e por reorientar o modelo turístico. Tamén se apunta a necesidade de impulsar a vinculación da zona vella de Santiago á innovación e o coñecemento, xunto co apoio ás actividades creativas e de organizar un esquema de mobilidade adaptada ás súas condicións específicas para vertebrar mellor a améndoa co seu contexto urbano e comarcal.
Programas de actuación
O documento está relacionado e debe influír noutros traballos de especial relevancia para a cidade, dende o PXOM ata o Plan de Transporte Metropolitano, pasando polo Plan Estratéxico de Turismo, o Plan de Mobilidade, ou o Plan de Acción Local polo Emprego.
En base a iso, este plan establece os programas de actuación máis importantes na cidade histórica, que deben atender a cuestións como a habitabilidade e a recuperación da vitalidade residencial; a reocupación das vivendas por residentes permanentes fronte ao modelo dos pisos turísticos; a implantación dunha rede de telecomunicacións na zona vella; ou o deseño dun novo esquema de mobilidade. O documento tamén recolle como actuacións prioritarias a promoción e divulgación do patrimonio de Santiago; así como para o desenvolvemento de actividades creativas e culturais ao tempo que se converte a cidade nun nó investigador vinculado á Universidade.
