Compostela, 26 de xullo do 2023 – A Asociación Peregrinos Musicales ofrecerá catro concertos de balde dentro da programación das Festas do Apóstolo.
Os concertos poderán desfrutarse na Praza de Mazarelos os días 27, 28, 29 e 30 de xullo ás 20.00 horas. Ilona Timchenko, presidenta da Asociación Peregrinos Musicales, explica que “Tras a boa acollida rexistrada na anterior programación das Festas do Apóstolo, agradecemos que o Concello siga apostando por este formato de concertos de música de cámara nunha contorna tan emblemática como a Praza de Mazarelos”.
Os catro concertos incluirán tanto artistas consagrados como novas promesas da música clásica. A primeira das xornadas, mañá xoves, será protagonizada polo cellista vigués Jorge Suárez, Premio Especial ao Mellor Intérprete do Certame de novos Talentos Peregrinos Musicales e gañador do Premio da Asociación Peregrinos Musicales, recentemente outorgado dentro do XIII Festival Peregrinos Musicales. O seu repertorio incluirá a Suite nº1 de Bach, a canción popular Cant dels Ocells, a Suite para violonchelo solo, de G. Cassadó, e a peza Stonehenge, de Pejtsik.
O venres 28 de xullo será a quenda do Ensemble 4 Estacións de Vivaldi, formado por músicos portugueses dunha gran traxectoria internacional: os violinistas Sergey e Alexander Arutyunyan, e Larissa Shomina, ademais do cellista Bruno Miguel Pinheiro Fernándes. Na súa actuación interpretarán o famoso ciclo de pezas do compositor Antonio Vivaldi.
A xornada do sábado 29 de xullo reservarase para as novas promesas da música de cámara co Ensemble CSMG. O concerto estará protagonizado por mozos e mozas pertencentes ao Centro Superior de Música de Galicia e que contan cunha gran traxectoria. Con Manuel Villar como director e ao pianista Martín Chaves como solista, contará coa participación do saxofonista Pablo Castaño, o viola Aitor López, a clarinetista Adriana Rodríguez, ademais do vibráfono Jorge Denis Sanromán e da soprano e pianista Anna Mélikhova. O repertorio incluirá obras de Schumann, Max Bruch, ou Liszt, entre outros grandes compositores.
O concerto final deste ciclo de música de cámara correrá a cargo de Misha Zemtsov (viola) e Ilona Timchenko (piano). O programa musical deste dúo incluirá as seguintes obras: En estilo de Albéniz, de R. Schshedrine; Melodie im alíen Stil, de E. Zemtsev; Carmen Fantasie, de Bizet-Waxman; Andaluza, de E. Granados; Mallorca (Barcarola), de I.Albeniz, e a Sonata para Viola e Piano, Op. 120, No. 2, de Johannes Brahms.
Desde a Asociación Peregrinos Musicales animan a poboación de visitantes a gozar destas veladas de música clásica da man de grandes solistas e das novas promesas deste xénero. Trátase, pois, dunha oportunidade idónea para gozar de pezas de grandes compositores nunha contorna tan emblemática como a Praza de Mazarelos e de xeito totalmente gratuíto.
