Seguimos falando cos novos rexedores e rexedoras dos concellos tras as eleccións do pasado mes de maio. Chegamos a Padrón para falar con Anxo Arca, o municipio foi unha das sorpresas dos comicios, en especial fora do termo municipal xa que en clave local moitos vían chegar o cambio.
O socialista Anxo Arca quedouse a un concelleiro da maioría absoluta. O entendemento con Beatriz Rei, do BNG, é bo pese a negativa da nacionalista a entrar no goberno polo momento. O Partido Popular pasa á oposición sen unha idea clara de que facer é cun ex alcalde, Antonio Angueira, ausente mesmo en actos tan importantes como o Día de Padrón en Santiago e en Rianxo.
A entrevista chega cando se están cumprindo os cen primeiros días de goberno nos concellos. Anxo Arca fai unha valoración positiva de este período pero recoñece que con moito traballo porque as cousas estaban por facer.
Como dixemos xa, o Partido Popular está ausente desde a mesma noite das eleccións. O traspaso de poderes foi practicamente inexistente. Só un concelleiro prestou algo de colaboración.
A nula lealdade institucional viuse na celebración do Día de Padrón en Santiago, dentro das festas do Apóstolo. A ausencia de practicamente todo o grupo de goberno anterior foi algo moi comentado e que se repetiu non moito tempo despois en Rianxo.
Como sucede en algún concello máis, a situación económica de Padrón é un paradoxo. Multitude de investimentos, algúns urxentes, pendentes de facer é un remanente de tesourería de máis de catro millóns de euros. Anxo Arca di que é algo que non se explica aínda que adxectivos como deixamento ou desidia encaixan bastante ben.
Pensando xa nos seguintes orzamentos, Arca ten unha teima co salario dos traballadores. Foi un tema que motivou non poucas protestas dos sindicatos no pasado mandato. Deronse mesmo situacións absurdas como que un funcionario tivera recoñecida a antigüidade, comezásese a pagar para ao pouco tempo retirarlle o incremento. O alcalde non entende tampouco que tendo unha relación de postos de traballo aprobada non se aplicara.
Rematamos a conversa preguntado polas prioridades. O máis inmediato ten que ver cos equipamentos en educación, servizos moi necesarios nun cursos que acaba de comezar.
Anxo Arca mostra nas súas respostas unha determinación que é de agradecer. Fronte a prudencia, necesaria e comprensible, agradécese atopar respostas claras sobre o que se quere facer e en que orde.
O novo alcalde é consciente de que algúns, mesmo dentro do partido, non apostaban por el. Agora traballa arreo para facer as cousas ben e devolver a capital do Sar a un protagonismo que nos últimos anos quedou moi diminuído. Anxo Arca, con esta actitude, pode converterse nun referente dos novos alcaldes da bisbarra.
