Compostela, 19 de xunho do 2019 – A USC ofertará o vindeiro curso académico 2019 – 2020 un total de 44 graos, dez dobres graos e 66 másteres, nos seus campus de Santiago e Lugo.
O reitor Antonio López e a vicerreitora de Titulacións, Victoria Otero Espinar, deron conta en rolda de prensa dos principais indicadores da oferta docente da USC para o vindeiro curso. Entre as novidades, a institución docente incorpora graos como o de Robótica, a impartir en Lugo, e mestrados en Química na Fronteira entre a Bioloxía e a Ciencia de Materiais; Psicoloxía; e Enxeñaría de Procesado de Alimentos
En primeiro curso a USC ofertará 4.458 prazas, repartidas entre os 44 graos e nove dobres graos, tanto en Santiago como en Lugo. A institución compostelá inclúe titulacións nas cinco grandes áreas de coñecemento: nove en Artes e Humanidades, oito en Enxeñaría e Arquitectura, catorce en Ciencias Sociais e Xurídicas, oito en Ciencias da Saúde e outras cinco no ámbito das Ciencias. Igualmente oferta catro dobres graos en Ciencias, dous en Ciencias Sociais e Xurídicas, dous en Enxeñaría e Arquitectura e un en Ciencias da Saúde. Ademais da incorporación de Robótica, o grao de Xeografía e Ordenación do Territorio presenta unha nova edición reformulada e actualizada.
Completando o catálogo formativo, a Universidade compostelá suma un total de 66 másteres oficiais: 12 correspondentes á área de Artes e Humanidades, e outros tantos ás de Ciencias e Ciencias da Saúde, ademais de 20 en Ciencias Sociais e Xurídicas e outros dez en Enxeñaría e Arquitectura. En total, a USC ofertará 1.849 prazas nestes mestrados, dos que 26 son de carácter interuniversitario.
