Ames, 1 de febreiro do 2022 – O concello de Ames ven de rematar as obras dunha pista de “pump track” situada na rúa do Pedregal de Bertamiráns.
A Concellaría de Deportes adxudicou a construción de esta pista de “pump track” a finais do pasado mes de setembro, cun investimento de 48.077,03 euros. O alcalde de Ames, Blas García, a concelleira de Deportes, Susana Señorís, e o encargado da brigada de Obras, Juan Calvo, visitaron as instalacións na mañá deste luns.
Un “pump track” (literalmente, “pista con bombeo” en inglés) é polo xeral un espazo de dimensións variables en forma de circuíto, con múltiples saltos e peraltes. Grazas á inercia xerada e á propia habilidade das persoas usuarias, o deseño da pista permite realizar o percorrido sen practicamente dar pedais ou impulsos nas bicicletas, patíns ou monopatíns.
A construción das instalacións consistiu na roza, limpeza e movemento de terras do solar orixinal, para despois realizar e instalar a pavimentación, o saneamento, o alumeado e a restauración ambiental do espazo.
A concelleira de deportes, Susana Señorís, explicou que “Deseñamos o espazo pensando na súa polivalencia, apostando polo ciclismo e os deportes de inercia. Buscamos cubrir os gustos e afeccións da maior cantidade de usuarios e usuarias, tanto nenos como adultos, e que as instalacións se adapten ao nivel de destreza de cada un”.
Neste senso, a disposición do circuíto busca precisamente dar resposta a todos os tipos de usuarios e usuarias, tanto a niveis de dificultade como ás diferentes disciplinas. O trazado non ten obstáculos de alturas significativas, o percorrido é de sentido único e conta con sinalizacións pintadas que precisan a dirección de uso. Uns 103 metros de traxecto no que tanto expertos coma principiantes poidan gozar das súas bicicletas, monopatíns, patíns e patinetes.
