Compostela, 31 de agosto do 2018 – O Monbus Obradoiro presentou as Camisetas Oficiais de xogo, que o persoal lucirá nos encontros da tempada, ademais da asignación de dorsais decidida cos xogadores.
A conselleira do Monbus Obradoiro, Lupe Murillo, foi a encargada de presentar as camisetas das que dixo que ” A principal novidade é unha tendencia e por iso esta tempada as camisetas serán con mangas. Aínda que o primeiro equipo vai xogar con esta nova camiseta, manteremos á venda tamén a camiseta clásica, para todos aqueles afeccionados que a prefiran sen mangas. Os novos equipamentos estarán á venda a partir da Supercopa Endesa e a versión clásica está á venda desde xa, tanto en Tiro Libre como na súa web, cunha promoción de lanzamento especial de 30€ para abonados e 40€ para non abonados, dispoñible ata a primeira xornada de Liga”.
O xogador do Monbus Obradoiro, Nacho Llovet, fixo de modelo vestindo o primeiro equipamento, azul e branco como as cores da bandeira de Galicia, e suxeitando o segundo equipamento, que esta tempada recupera a cor negra que o equipo xa vestiu en tempadas anteriores.
Os dorsais
Os xogadores do Monbus Obradoiro escolleron os seus dorsais para a tempada 2018/19 e comunicaron as razóns da súa elección:
3 – Albert Sàbat: “Sempre xoguei co 6, pero en cando cheguei ao Joventut xa estaba ocupado por outro xogador. Así que como me gustaba o número 3, por nada en especial, quedei con ese. Ao chegar ao Monbus Obradoiro a pasada tempada decidín mantelo”.
7 – Ben Simons: “Continúo co número 7 porque sempre quixen levalo en Estados Unidos pero alí non puiden. Desde que xogo en Europa, comezarei a miña cuarta tempada agora, sigo co número 7”.
8 – Kendall Stephens: “Decidín que no Monbus Obradoiro xogarei co 8 porque é o número favorito da miña irmá”.
9 – Nacho Llovet: “O meu número favorito era o 7 pero cando cheguei á Penya estaba retirado por Margall e escollín o 9. É un número que xa levara outras veces porque ten un significado importante (nacín un día 9, a miña irmá un 19 e o meu pai xogaba co 9) así que ao chegar ao ‘Obra’ hai dúas tempadas decidín mantelo. E así seguirá”.
10 – Vladimir Brodziansky: “Empecei utilizando o número 10 cando xoguei por primeira vez co equipo do meu país e desde ese momento quedei usando ese”.
13 – Andreas Obst: “Xoguei co dorsal 13 os primeiros 8 anos que practiquei baloncesto. Despois, ao ser o máis novo no equipo alguén o escollía e tiven que cambiar. Cheguei ao ‘Obra’ e como estaba dispoñible escollino de novo”.
14 – Maxime de Zeeuw: “Non existe ningún motivo en concreto pero simplemente escollín xogar co 14 porque foi o primeiro dorsal co que xoguei como profesional e nunca quixen cambialo”.
16 – Nick Spires: “Sempre xoguei co 14 ou o 16. No caso do 14 porque foi a idade á que fun consciente de que quería dedicar a miña vida ao baloncesto de forma profesional. Mentres que o 16 foi cando comezou a miña carreira profesional. Así que ao chegar ao Obra a tempada pasada escollín o 16”.
20 – David Navarro: “O meu número favorito e o que levei sempre foi o 15, pero ao chegar a Santiago estaba retirado por Oriol Junyent. Como Manu Ginobili foi un dos meus xogadores favoritos de sempre e leva o 20… Decidinme por ese”.
32 – Tryggvi Hlinason: “A miña primeira idea era escoller o 15, pero no ‘Obra’ está retirado por Oriol Junyent, así que me decantei polo 32”.
44 – Pepe Pozas: “Sempre xoguei co 4 ou 14 pero cando cheguei ao Obra tiven que escoller outro, así que me decidín polo 44”.
54 – Martins Laksa: “O meu pai xogaba co número 9. Eu tamén o utilicei cando era pequeno pero logo adoitaba estar ocupado. Quixen crear a miña propia identidade e como non coñecía moitos xogadores co 54… Ese escollín!”.
77 – Kostas Vasileiadis: “A primeira vez que xoguei no ‘Obra’ tiven o 7 pero esta tempada teno Ben Simons. O segundo motivo, e máis importante, xa o levei a tempada pasada en Iberostar Tenerife e como xoguei ben, quíxeno levar aquí tamén”.