Noia, 14 de marzo do 2019 – O pavillón polideportivo Agustín Mourís acollerá dende este venres 15 ata o domingo 17 de marzo unha nova edición da Feira do Comercio de Noia. Unha cita foi presentada polo presidente da asociación empresarial, Francisco Pérez, e da concelleira de Comercio, Mariola López.
A concelleira explicou que “A Feira do Comercio de Noia manterá a estrutura de praza central, como o ano pasado, xa que resultou do agrado das empresas participantes. Nesta edición contaremos con algún participante máis, sendo un total de 24 expositores”. Entre os artigos que se porán á venda a prezos de saldo atoparanse, principalmente, roupa e complementos, moda infantil e deportes.
A entrada será libre cun amplo horario según afirmou o presidente de Noia Histórica, entidade encargada de organizar esta cita. As portas abriranse o venres entre as 17.00 e as 21.30 horas, mentres que o sábado poderase asistir entre as 10.30 a 21.30 horas e o domingo, de 10.30 a 21.00 horas. Do mesmo xeito, “contaremos con servizo de ludoteca e animación para a cativada e cun servizo de cafetería”.
Definida como unha das iniciativas pioneiras a nivel galego a prol da dinamización do comercio, a Feira do Comercio de Noia celébrase dende o 2006. Noia Histórica ven ademais de obter o Accésit Honorífico no Premio Nacional de Comercio. Francisco Pérez explicou que “unha delegación de Noia Histórica e do propio Concello desprazarase a Madrid o vindeiro 21 de marzo para participar na entrega deste recoñecemento que, agardamos, sirva de exemplo e de ánimo para seguir a traballar nesta liña no futuro”.