Compostela,14 de xuño do 2017 – Xandobela organiza unha xornada formativa arredor da lectura e fomento do hábito lector dentro do proxecto erasmus+ “The adventure of reading” na que participarán representantes de varias organizacións europeas
Ata o 15 de xuño, Compostela acollerá a quinta reunión transnacional do proxecto “The adventure of reading”, seleccionado polo programa europeo Erasmus+ entre máis de cen solicitudes na convocatoria do 2015. No programa de actos da reunión destaca a xornada formativa e de intercambio arredor da lectura e fomento do hábito lector, que terá lugar mañá xoves 15 de xuño na Galería Sargadelos, e na que participarán representantes das entidades europeas e persoas e profesionais locais vinculados ao mundo da animación á lectura desde distintas especialidades e experiencias. Presentaranse, ademais, os resultados intelectuais do proxecto froito do proceso de investigación e experimentación de novas metodoloxías no campo da animación á lectura e o fomento de hábitos lectores.
‘The adventure of reading’ é un proxecto europeo do programa Erasmus+, liderado por Xandobela desde Galicia, en parcería coa Associação Para o Desenvolvimento de Pitões desde Portugal e La Corte della Carta desde Italia, que busca explorar e desenvolver novas estratexias para o fomento da lectura e a promoción de hábitos lectores a través de enfoques creativos para a dinamización da cultura, o multilingüismo e a interacción social.
Todo o proxecto parte da convicción da importancia de integrar catro eixos temáticos que sempre se traballan de xeito illado cando se fala de animación á lectura: a) a importancia da tradición e narración oral; b) a necesidade de persoas mediadoras formadas e actualizadas; c) a importancia de crear novos (non convencionais) espazos/escenarios/recursos para a animación á lectura desde enfoques creativos, artísticos e participativos; d) a necesidade dun repertorio literario amplo, diverso e rico. O noso reto e misión é conseguir artellar unha metodoloxía que xunte todos estes elementos de xeito coherente, rigoroso, integral, didáctico e, que ao mesmo tempo, sexa transferible e susceptible de ser introducida en calquera contexto e realidade social e/ou cultural.
Xandobela leva xa nove anos participando e xestionando proxectos europeos, traballando en rede con entidades análogas en Europa, coa intención de achegar á nosa terra as correntes de intervención e innovación educativa hoxe en día máis interesantes e situar Galicia no mapa europeo.
Dentro do programa de Xandobela para mañá xoves inclúense as seguintes actividades a celebrar na Galería Sargadelos:
Obradoiros de formación
12h. brincar coas lendas. nivel 1. – Brincaremos cos contos, coas palabras, co noso corpo, coa nosa voz, con monicreques e tamén xogaremos cos obxectos a animalos, a espertar a metáfora que durme dentro deles, para que formen parte do espazo escénico e sirvan de reforzo á palabra sen quitarlle protagonismo.
Imparte: Raquel Queizás (contadora, actriz e titiriteira).
16:30h. “contar é caer da burra” – Escoitar, conversar, colleitar, destilar, contar, convivir… Tradición oral e contar, un oficio que todos e todas temos.
Imparte: Celso F. Sanmartín (contador de tradición oral e poeta).
Falando de:
18:30h. guías de lectura para calquera compostura – Presentación dos resultados do proxecto europeo Erasmus + ‘The adventure of reading’ con representantes das entidades parceiras ‘La Corte della Carta’ (Italia), Asociaçao para o desenvolvemento de Pitoes (Portugal) e Xandobela, Educación e Cultura (Galicia).
19h. faladoiro sobre a animación á lectura – Comparten mesa e mantel: Celso F. Sanmartín (contador de tradición oral e poeta), Raquel Queizás (contadora, actriz e titiriteira), Fátima Villamel (mestra e contadora), Sole García (administrativa e nai).
inscricións de balde para os obradoiros de formación en:
