Teo, 15 de xuño do 2017 – Teatro, emigración e memoria familiar son os tres elementos sobre os que xiran as actividades que o actor Borja Fernández presenta esta semana no CSC Constante Liste de Teo, e que inclúen o espectáculo Salvador e un encontro-obradoiro para o que se está a contar coa comunidade local.
Estas dúas propostas foron desenvolvidas dentro da Berberecheira, un espazo-laboratorio de creación promovido por Chévere, e forman parte do programa de residencia da compañía no concello de Teo.
Obra teatral: Salvador, de Borja Fernández. Venres 16 e sábado 17 de xuño ás 22.00 h.
Dentro do programa de residencia en Teo, Chévere abriu un espazo-laboratorio denominado a Berberecheira, para dar soporte e asesoramento a proxectos de investigación escénica que axuden a documentar aspectos da nosa historia recente. O primeiro proxecto saído da Berberecheira foi Goldi Libre, un traballo sobre o movemento de insubmisión ao servizo militar a partir da experiencia persoal dun veciño de Teo. O segundo proxecto chámase Salvador e trata sobre os movementos migratorios a partir da memoria familiar do actor e músico Borja Fernández, colaborador habitual de Chévere.
Ao remate do obradoiro sobre memoria e emigración que onte desenvolveu en Teo falamos co actor sobre estes proxectos
SALVADOR é unha obra de Borja Fernández para un actor/músico e unha video jockey/manipuladora de obxectos, a medio camiño entre o documental e a ficción teatral, na que se combinan texto, movemento, música en directo e proxeccións de vídeo.
SALVADOR trata sobre os movementos migratorios, as desaparicións e os reencontros, centrando o seu interese nos casos de homes casados que emigraron sós a mediados do século pasado a Suramérica e no impacto da súa ausencia na configuración das comunidades locais, das familias e dos seus descendentes. SALVADOR investiga especificamente a misteriosa figura de Benito Fernandes Meirinho, avó paterno de Borja Fernández, que emigrou a Brasil en 1959 e nunca máis volveu.
Idea e creación: Borja Fernández. Dirección: Borja Fernández e Uxía Vaello. Asistencia dirección: Diego Anido. Asistencia dramatúrxica: Claudio Días. Textos: Borja Fernández e Manuel Cortés. Audiovisuais e iluminación: Laura Iturralde. Espazo sonoro: Borja Fernández. Asistencia artística en residencia: Colectivo A Berberecheira (Grupo Chévere). Vestiario: Uxía Vaello. Produción: Borja Fernández.
