Brión, 22 de setembro do 2020 – O concello de Brión suspende todas as actividades vinculadas a festividade de Santa Minia e advirte de sancións pola ocupación da vía pública.
No mes de xullo o ex alcalde José Luís García avanzaba, na entrevista que publicábamos en Lindeiros.gal, que sería moi difícil celebrar a festa sen un cambio significativo na situación. Agora o concello de Brión confirma a anulación da Romaría e de todas as actividades a ela vencelladas como as verbenas, actuacións culturais, postos de venda, atraccións, polbeiras, queima da fachada, animación de rúa, etc.
Imaxe de arquivo da festa de Santa Minia
O único que se mantén é unha gran tirada de fogos de artificio dende Brión, Bastavales e Viceso que poderá ser seguida desde calquera parte do municipio, evitando así a aglomeración de xente. O novo alcalde, Pablo Lago, mantivo unha reunión co equipo organizador do programa de Santa Minia, así como coa Policía Local, para analizar a situación de cara a esta próxima fin de semana. O Concello lembra que todas as actividades están suspendidas e que non autorizará a instalación de ningún tipo de posto, xa sexa de venda, alimentación ou atracción lúdica, en espazos de dominio público.
O único que se mantén é a programación de misas, xa que a súa organización e desenvolvemento non é competencia do Concello de Brión, senón da Igrexa. Aínda así, a Policía Local velará en todo momento polo correcto e estrito cumprimento do protocolo anticovid nestas celebracións relixiosas. Unha tarefa para a que contará tamén coa colaboración da Garda Civil na tarde/noite do sábado 26 de setembro e durante o domingo 27 de setembro, Día de Santa Minia.
Dende o Concello de Brión lamentan a suspensión da súa máis emblemática festa, que este ano ademais cadraba en domingo, o que podería supoñer nun ano normal a asistencia duns 50.000 romeiros e romeiras. Porén, o incremento de contaxios na área sanitaria fai que o máis prudente sexa a suspensión de toda a programación preparada polo Departamento de Cultura para esta fin de semana, tal e como se anunciou a principios deste mes de setembro.
