Brión, 4 de maio do 2020 – O Concello de Brión terá que facer un Plan Económico Financeiro ao incumprir a regra de gasto na execución do orzamento do 2019.
O informe de intervención indica que se compren as regras de estabilidade orzamentaria e límite de endebedamento, pero que se incumpre a regra de gasto, polo que será preciso aprobar un Plan Económico Financeiro. O informe explica que o límite de gasto estaba no 2,7% pero que o Concello de Brión o superou ao executar practicamente o 100% do seu orzamento.
O secretario municipal informou de que a liquidación do orzamento de 2019 deixa un remanente de Tesourería para Gastos Xerais de 4.615.746,01 euros e un resultado orzamentario axustado de 918.572,2 euros.
O alcalde de Brión, José Luís García, explicou o paradoxo “executamos o 96% do orzamento de 2019 e iso fai que incumpramos a regra de gasto, polo que xa temos preparado o correspondente Plan Económico Financeiro”. O alcalde explicou tamén que o devandito plan non puido ser presentado nesta sesión plenaria debido a que o posto de Intervención en Brión está vacante, logo da marcha da anterior titular que actuará como acumulada ata a chegada dunha persoa que a substitúa.
No resto da parte dispositiva, o pleno aprobou por unanimidade a acta da sesión anterior e unha corrección realizada para incluír máis planos no proxecto de mantemento e mellora das redes de saneamento e abastecemento de Chave da Ponte, rúa Gondar, Cabanas, Saíme, Bastavaliños, Soutullos e Bemil, orzamentado en 146.774,9 euros e incluído no Plan Complementario 2020 da Deputación Provincial da Coruña.
