Brión, 29 de decembro do 2018 – O centro social polivalente de Brión acolle esta tarde, ás 20:30 horas, a obra “Nacidas libres”, dirixida por Cristina Domínguez e sobre un texto de Cándido Pazó.
Nacidas libres é unha peza da compañía Contraproduccións. Foi programa inicialmente para conmemorar o Día Internacional contra a Violencia de Xénero pero, en aquela ocasión, tivo que ser atrasada.
Trátase dunha obra dirixida a un público maior de 13 anos na que as actrices Rocío González, Susana Dans, Casilda Alfaro e Mónica Camaño interpretan ata unha ducia de personaxes que reflexionan sobre distintos temas vistos dende a perspectiva de xénero: a desigualdade, a emigración, a ilusión da liberdade, os condicionantes da muller nas distintas culturas… A entrada é libre e de balde.
A actuación está organizada polo Concello de Brión, que conta coa colaboración da Rede Cultural 2018 da Deputación Provincial da Coruña, e coa subvención do AGADIC e da Xunta de Galicia.