Ames, 22 de setembro do 2017 – Mañá sábado, 23 de setembro, Ames volverá acoller un novo Encontro Intercultural, aberto a toda a veciñanza. Será no Pazo da Peregrina de Bertamiráns, a partir das 17:00 horas.
O Encontro Intercultural, organizado pola Concellaría de Servicios Sociais, incluirá a degustación dalgúns pratos tradicionais preparados por varias familias migrantes afincadas en Ames, un obradoiro de cometas guatemaltecas e dúas actuacións: a do grupo de danza popular venezolana “Alma Llanera” e a da cantante de tangos Rocío Freijanes.
Este encontro Intercultural naceu no ano 2008, procura a interculturalidade entre a veciñanza de Ames mediante o intercambio de saberes e sabores, favorecendo a creación de lazos e dando a coñecer diferentes culturas a través de algo tan común como é o comer. Nos seus comezos, estes encontros eran organizados nas aulas de castelán e galego, impartidas polo Concello ás persoas migrantes chegadas a Ames. Posteriormente, a iniciativa pasou a ser aberta a toda a veciñanza.
Algúns dos pratos que se poderán degustar este sábado son: conservas de coco, pan de xamón e arepas de Venezuela; ceviche de gambas de Colombia; kibe e brigadeiros de Brasil; garnachas e dobladas de Guatemala; moro de frijoles con costela de República Dominicana; funge de muamba e pudim de Angola; augas de froitas de México; pastas de té de Marrocos; e empanada e bica de millo de Galicia.
