Vila de Cruces, 1 de outubro do 2020 – O voceiro do BNG de Vila de Cruces, Alejandro Fiuza, ven de presentar alegacións aos parques eólicos previstos en Axouxere, Cunca e Rodeira nos territorios de Vila de Cruces e Silleda.
Os proxectos de eólicos están en exposición pública desde o 5 de xuño no que atinxe ao impacto ambiental. A empresa que os desenvolve é a mesma que xa se atopou con oposición na zona de Ordes, Green Capital Power.
A primeira alegación ten que ver coas infraestruturas de alta tensión que terán que construírse para conectar os parques coa subestación de Silleda e que afectará ao Mosteiro de Carboeiro. No documento fálase de que estas torres “ocasionarán negativos e irreparables efectos sobre o ecosistema do monte, tendo ademais un carácter irreversible”.
Na segunda alegación faise referencia a contradición que supón que a petición de instalación dos parques aluda a ” necesidade crecente de enerxía dentro dunha situación de respecto ambiental” cando Vila de Cruces, pese a ser un gran produtor de enerxía eléctrica, segue sufrindo cortes de suministro en moitos lugares e moi a miudo.
Finalmente o escrito explica que Galicia ten bastantes parques eólicos e é unha comunidade con excedentes de electricidade con respecto ao seu consumo interno. Baseándose en esta circunstancia denunciase a “posible incompatibilidade entre o uso que se pretende dar a este aproveitamento eólico no Bustelo (e tamén nas partes afectadas do Campelo, parque co que compartiría infraestrutura) e o rendemento obtido do mesmo”.
O escrito alude tamén a afectación da zona Rede Natura 2000 no sistema fluvial Ulla Deza que xa sofre o paso da liña de alta tensión Mesón do Vento a Lindoso. Menciona así mesmo o custo social provocado pola contaminación acústica, contaminación visual, perda de terreos e incluso vivir a carón de liñas de media tensión que pasan ao lado das propias casas, a menos de 500 metros dos Aeroxeradores.
O último apartado dedícase a transparencia e critica que a única comunicación oficial fora un escueto bando do goberno local que complicou a presentación de alegacións por parte da veciñanza que tivo que apurar os prazos para oporse á instalación.
