Bisbarra, 27 de novembro do 2023 – Os grupos do BNG na Estrada, Vedra e Vila de Cruces presentarán aos respectivos plenos unha moción referente ás plantacións intensivas na D.O. Rías Baixas.
Na exposición de motivos explican que ven de crearse unha plataforma en defensa do val do Ulla que alerta do problema de dedicar grandes extensións de terreos a plantacións intensivas de viñedos.
Para habilitar esas grandes extensións a plataforma denuncia que isto supón “a tala de grandes masas de bosque autóctono, incluso bosque de ribeira, eliminando así o papel ecolóxico que compren estes bosques”.
Por outra banda estas prácticas supoñen a redución de terras agro-forestais o que provoca incluso un “aumento do seu prezo e distorsión no mercado de xeito que resulte inalcanzable para a posibilidade de incremento da base territorial da maior parte das explotacións da zona”.
Tamén explican que “a pesares da prohibición de rega do viñedo, é ben sabido que a práctica totalidade das novas plantación van dotadas de elementos de fertirrigación, o que supón un significativo incremento no consumo de auga destinado a estes cultivos”.
Estas plantacións intensivas supoñen unha importante aportación de fertilizantes que acaban afectando aos acuíferos e a propia salinización do sustrato, rompendo cos modelos clasicos de explotación máis sostibles de menos carga e espazos máis limitados.
Isto tamén vai supor o uso de enormes cantidades de fitosanitarios para o control de pragas e enfermidades, co efecto acumulativo que acaba trasladandose ao medio ambiente, coas conseguinte afección á fauna e microfauna.
Os nacionalistas rematan a exposición engadindo que o modelo de plantacións intensivas “parece deseñado para beneficio exclusivamente de grandes adegas ou grupos empresariais que tratan de establecer un sistema de monocultivo intensivo en grandes espazos”
Para o BNG este modelo “nada ten que ver co modelo agrario presente na zona que combina viñedos con bosque, pastos, terreos para forraxe e horta nun mosaico de explotación territorial moito máis sostible, menos contaminante, xerador de riqueza na zona e fixador de poboación”.
A moción advirte de que na actualidade as plantacións intensivas afectan principalmente a Vedra e Boqueixón pero, explican, “é un proceso que vai seguir e afectará moi probablemente da mesma maneira á parroquia silledense de Cira, ás cruceñas de Gres, Camanzo e Añobre e as estradenses de Baloira, Santa Cristina, San Miguel de Castro e Arnois incluídas na D.O. Rias Baixas”.
Os acordos que se solicitan se concretan no traslado do apoio das corporacións á veciñanza do Val do Ulla “nas súas demandas para que de facerse novas plantacións de viñedos estas se fagan de maneira ordenada e respectando os seus medios e modo de vida”.
Nun segundo punto ínstase ás corporacións a “solicitar á Xunta de Galiza que desenvolva, a maior brevidade, o catálogo de usos e orientacións produtivas que contempla a Lei 11/2021 de recuperación da terra agraria de Galiza, e que para o mesmo sexa preceptivo informe municipal para calquera cambio de uso de solo forestal a agrario para plantación de viñedos de forma intensiva”.
